NCD kübok sub-committee balala anena atatsü

Dimapur, Metsüremi/March 02 (TYO): Naga Council Dimapur (NCD) ajanga Dimapur nung March 2, 2020 anepdang 11:00 ako nung Councilor tem ajungben senden ka ayonga mena liasü. Iba senden nung tongtibang süa jembiba onükji kin kari ashishiba ama councilor tem indang kümsük atsülangtsüba indang liasü. Tir Bangerloba-i senden nung adenertem pelashishia agizükba sülen council züngsem Holuto Aye-i sarasadema senden tenzük.
Iba senden nungsa züngsemtemi March 31, 2020 madongdangsa lokti senden ayonga agitsü lemtet, aser idangji kümsük tasen asoshi ketdangpur tasen shimokba dena maparen ajak inyaktsü.
Maneni Annual General Meeting (AGM) alitsü mechi NCD kübok Public Action Committee (PAC), Vigilance Committee aser Trust Finance Committee amala sub-committee ajunga March 03, 2020 nungi anena atatsü iba senden nung lemtet, ta NCD general secretary Thsapongkyu Sangtam ajanga sangdong ka nung metetdaktsü.