KRYO aser KRWO-i yi pua raksatsü

Kohima, Metsüremi/March 2 (TYO): Khikha-Rüleizou Youth Organisation (KRYO) aser Women Organization (KRWO) tanü Industries Office, Kohima kübok parnoki pua aliba yi raksatsüogo.
KRYO tir Apele Suokhrie-i ashiba agi, parnok apuba yi ya sen lakh 3.50 alang liasü aser tang lokti tentet ana yagi colony nung alirtem aser Kohima Bible College kaketshirtem matsüngdang raksaa indokogo.
Paisa, Khikha-Rüleizou Colony, Kohima nung tenokdangba kecha melei pan dokan aser nika kidang IMFL aser local yi kanga bulua ayonga ngua colony nung iba lokti tentet ana yagi aonung ana atonga meita ao aser dokan 13 aser nija kidang nungi IMFL aika apu, ta ashi.
Küm ishika ozüng alem yi yoka arudar, ajisüaka state sorkar aser Excise Department-i iba ya nokdangtsü asoshi jenjang tapet magi-i arudar, ta paisa ashi.
Colony nung yi kanga sadema ayokba ajanga aiben mepetmesü adoker aser iba ajanga colony nung alirtem tesunep nung meliteter, koba aremzüktsü mekoki aküm, ta Apele-i ashi.
Anungji state sorkari kecha jenjang magitettsü ta angateta colony nung lanur aser tetsür lokti tenteti ozüng alema yi ayokba nokdangtsü aser colony nung temenen mapa balala inyakba nokdangtsü asoshi iba jenjang ya agitsüsa aküm, ta pai ashi.
February 22 nü colony nung yi ayoktsü memelar ta shia jelia osang agüjaka parnoki teka amteper minyak anungji yi poyonga ao aser parnok dang senchia chiogo, ta pai shisem.
Advisor, Rhüdezou Lhisepfüko Krotho, Sosino Kesiezie-i ashiba agi, colony lokti tentet temi mezüngbo ozüng alema inyakba maparen anentsü asoshi mepeshia ao, saka tamakok angu anungji tashiyim agi jenjang tapet agiogo.
Tanü yi raksatsüba mapang parnoki IMFL bottles, breezer aser cane beer lapoka kilentsü nung yintoktsü aser tzü agi shizüka yok.
Maneni lokti tentet ana yagi yi nokdangtsü asoshi nokdaktsü bangjemogo aser aibelenertem ozüng tesashi agi merenshitsü metetdaktsüogo.