JCPI-i ILP mapa kümdanga inyaktsü metetdaktsür

Dimapur, March 2 (TYO): February 27, 2020 nü Dimapur District Administration-i police den külemi Clock Tower temeket nung inner-line permit (ILP) mita aodang nisung 40 shi pur DC indang Office-i anir aoba aser sen 600 senchi achiba osangkakettem nung metetdaktsüogo.
Iba maparen atema Joint Committee on Prevention of Illegal Immigrants (JCPI)-i tebilemtsü abenba osang ka metetdaktsüogo.
Ajisüaka, District Administration-i teinyaktsü mapa shitak mesüi ILP mapa inyakba ajanga Nagaland nung tsümartem kanga aoksadaktsüogo. ILP maparen inyaktsü atema tatembang telemtetba ka magi lir, anungji ketdangsertemi kechi ozüng kübok senchi achi ta asüba tasüngdangba adoker, ta JCPI-i asüngdang.
Dimapur nung ILP mapa shitak aser timi inyaktsü merangba mapang, telok aser kija kari parnok nija ajangzüktsü atema inyakba mapa aitsür aser kobi melii parnoki iba mapa atema telangzüba agütsütsüsa akümtsü, ta JCPI-isa ashi.
December 1, 1963 cut-off year ser ILP mapa tiptema inyaktsü atema JCPI-i telok mesüra kijatem den olemteptsü mulunga lir, ta parnokisa shisem.