ADC Medziphema indang office tasenba semzükogo

Dimapur, Metsüremi/March 06 (TYO): ADC, Medziphema sub-division indang office building tasenba March 06, 2020 nü Zhaleo Rio, IAS(Retd.), Advisor, Sericulture, Excise & Minority Affairs, Government of Nagaland ajanga semzüktsü aser Rev. Zhabu Terhüja, Pastor, BC’A’MT, Medziphema Town ajanga meshiteta sarasademtsü.
Tetushi tesemdanger ka ama iba sentong nung nüburtem aser lenirtem den jembiba mapang Zhaleo Rio-i ashiba agi, iba office tasenba atema nüngshilong ya 2008 küm Chief Minister Neiphiu Rio-i azüngtsü, saka meimlai aliba kuli kar ajanga iba ki yangluba menutsüsa aküm aser 2015-15 mapang ang kisü tenzük.
PDA sorkari masetshie yariba, contractor aser iba kisüba nung sentaktepa alirtemi mapang shidak nung story ana aliba ki renemba asoshi pai pelaba lemsatep, kong tanga attached department asem amenoksemtsü.
ADC office aser staff temi tongti shilem agibatem nüburtem dang tongmelang agi rasaa ashiba mapang pai iba office nung inyaker dang yimtsüng aser jila 23 agi kümtetba Medziphema sub-division nung nüburtem ajangzüktsü asoshi tajungtiba nung inyaktsü ajungshi.
Paisa sorkar dang iba office nung staff, dobashi aser office nung nüngdakba osettsüset tem peria agütsütsü asoshi mepeshia liasü aser tim inyakyim amshia office nung nüngdakbatem lemzüktsüba peritsütsü ashi.
Nüburtemi kaket reju, lenmang, water supply aser health care facility amala aginer, saka item terenlok asoshi land ownership system yagi tetsükdaktsü agütsür aser sorkari Nagaland Land Laws Act benoktsü asoshi inyaktepdar, ta Zhaleo Rio-i ashi.
Iba temzüng yagu nüburtem asoshi terenlok bener aruba nung ali kimong temelaba nung agitettsü aser iba ajanga tekeraba nung terenlok alitsü, ta pai ashi.
Nüburtem ajangzüktsü asoshi yangluba sentongtem nung nüburtemi maneni busemtsüla aser iba ajanga dang tarutsü nung yimchi-yimjung alitsü, ta pai ashi.
Iba sentong ya Tshuvisie Phoji, NCS, ADC, Medziphema lenisüba kübok agi, kong Er. Sungti Amer, Executive Engineer, CAWD, Kohima ajanga ‘Technical Report’ agüja liasü.