NU Kohima campus nung International Women’s Day mongogo

Prof M Aleminla Ao den lecture aser kaketshirtem March 06, 2020 nü NU Kohima campus nung International Women’s Day amongdang tangokba noksa nung angur.

Dimapur, Metsüremi/March 06 (TYO): Nagaland University Kohima campus nung March 06, 2020 nü ‘I am Generation Equality: Securing Women’s right #eachforequal’ omen nung ajemdaker International Women’s Day 2020 mongogo.
Iba anogomong nung jembiba mapang Pro VC Nagaland University Prof M Aleminla Ao-i ashiba agi, alima nung tetsür-tebur ajunga kasa libalirutsütettsüsa yangerba nung nisung ajak shilem lir ta maongka agütsütsü asoshi iba anogomong ya amonger. Iba anogo ya tetsürtemi lenla balala nung takok angoba benjongtsü asoshi kisüng masü saka gender equality atema tekeraba nung mapa küma inyakdaktsütsü asoshi amonger, ta lai ashi.
Mapang talangka nungi tetsürtem temeden atema jembia arur, aser alima nung tetsürtem temeden meilongi renlokaka linük ka nung danga gender equality nung takok angoba sangdonga mali, ta lai ashi. Tang tashinung tetsürtem kechi jenjang nung ali aser tenokdangbatem raksatsü asoshi kechi mapatem inyaknung ajungtsü, itemji angatettsü mapang agi tongogo, ta laisa ashi.
Prof M Aleminla Ao-isa kidang mapa kasa inyaktsüba, yimtenren aser office nung kasa shilem agitsüba, telemtetba balala agiba nung kasa alitsüba aser tetsür aser tebur atema jenjang kasa yutsütsüba indang jembia liasü. Tetsür-tebur mebendangi kasa temeden agia, yimjung nung sadoka azüdokshi nungi pila alitsü lima ka yanglutsü asoshi lai ayongzük.
Department of Education nungi Prof Lungsang Zeliang-i iba sentong nung jembiba mapang, taküm tetsür temeden aser gender equality ya kanga tongtibang süa agir aser ibaji tim lir, kechiaser lokti ka aintsü asoshi ibaji nüngdaker, ta ashi. Ajisüaka alima ajunga nung lungjemer tetsür temeden asoshi inyakba nung kanga anü-alemer aser temolung masür, ta lai ashi.
Lungsang-isa ashiba agi, gender equality ya tetsürtem temeden atema kija masü saka nisung meimchir temeden asoshi lir, aser akhi mapang nungi angatetba samadakja ajak kasa temeden asoshi mera agitsü mapang tongogo. Higher education nung tetsür ka ama ketdangser, tesayur mesüra tesayur masüba mesüra kaketshir mesüra research agir kaka süaka asenok ya tia takar rongnung dena lir, kechiase asenoki ola adokteter, shirnoki kasa jenjang nung inyakteter aser temelenshi bena arutsü, ta laisa ashi.
Tetsür nem tashi temeden agütsütsü asoshi kija aser lokti lungjemer inyaktsü lai ayongzük aser ajak asoshi kasa litettsü lima ka yanglutsü asoshi tajung inyaktsü laisa ayongzük.
Lungsang-i ashiba agi, Beijing nung theme campaign ‘I am generation equality: realizing women’s rights’ sangdonger küm 25 ajunger, koba tesem ajungalen tetsür nem tashi aser temeden agütsütsü asoshi nükla tajung yur sangdongba rongnung tajungtiba lir.
Tarutsü putu nung tetsür lenirtem adokdaktsütsü aser maparen ajak nung taa kasa angutsü, sexual harassment aser tetsürtem anema azüdokshiba anendaktsütsü, yimtenren aser taküm jung telemtetba agiba nung kasa shilem agitettsü nükjidong yur iba campaign ya tenzük, ta lai ashi.
Kija aser loktiliba nung tetsürtemi shilem agitsü asoshi tetsükdaktsü agütsüba samadaktsütsü asoshi ajaki lungjemer tekeratiba nung mera agitsü laisa ayongzüka liasü.
Maneni NUSU tir Rhilo Mero-i kasa sentong nung jembiba mapang, International Women’s Day indang omen ya #EachForEqual asünung, akhi tangatetba yimya nung lokti-i yangluba temzüng agi azüokba nung asenok mali tajungba aser telatet makai kasa nükla yur inyaknung koda ajungtsü, ta ashi.
Ibaji ataloktsü asoshi nisung shiai kati ka den kasa alitsü nüngdaker aser ibaji ajanga dang asenok ajak taso shia alitsü, ta pai ashi.