Kohima merüktsü atema campaign tenzüker

Kohima, March 6 (TYO): Temeket memerüki ayuba ajanga temang asoshi timtem bentsür arur ta asüba tebilemtsü bena nisung telok kati “Keep Our City Clean” (KOOC) Kohima tenteter campaign ka tenzükogo.
Hokolbarnü iba teloki campaign ji “Together we can” omen nung ajemdaker tenzük.
Iba telok nung shishilembartem, contractor, tesayurtem aser arogo lennirtem dena lir aser parnoki osang prokshitsü atema kentener Senti Semy, kaketshirtem aser saisapongertem aniokogo.
KOOC Kohima indang organising convener, Khriehuzo Lohe-i campaign tenzükba sentong nung “tang asenoki nüngdakbaji yimti merüka ayutsü atema külemi longjemtsüba lir” ta ashi.
“Asenoki iba mapa ya Kohima Municipal Council, Smart City mesüra urban department nem dang meyutsütsüla saka merükmejuba nung asenokia tongti shilem agitsüla” ta paisa ashi.
Nisung ajaki KOOC campaign ya ajak atema tongtipang ta angateta yariteptsü ayongzüker, ta Lohe-isa shisem.
Parnoki NGOs, village welfare organizations, kaketshirtem, lanurtem, local & non-local communities, schools & colleges, security forces aser taxis & city bus unions dang iba campaign nung yariteptsü atema asüngdangtsü, ta Lohe-isa metetdaktsü.
Kohima temerükba akümtsü atema parnoki Kohima aser temeket nung awareness campaigns agitsü aser lokti nübodoka mapa inyaktsü, ta paisa ashi.