Nagaland nung aluyimer 1,58,488 tajangzük angur

Dimapur, March 6 (TYO): Kisan Credit Card (KCC) kübok Nagaland nung aluyimer 1,58,488 tashi ajangzükogo. Iba scheme ya Indian bank temi aluyimertem nem sen aputsüba indang lir.
Hokolbarnü Dimapur DC indang conference hall nung osangbener den jembidang National Bank for Agriculture and Rural Development (NABARD) Assistant General Manager, H C Biswas-i iba osang metetdaktsü.
KCC ya 1998 küm tenzükba short-term credit limit scheme ka lir aser aluyimertemi zübazüba inyaktetba bank maparenji iba ya lir, ta Biswas-isa ashi.
Iba scheme kübok aluyimertem nem ATM/ RuPay Cards agütsür aser ibaji ajanga parnoki aluyimba nung nüngdakbatem aliteter aser sen agizükteter. Iba scheme kübok aluiyimertemi Rs 1.6 lakh tashi collateral free loan angutsü akok, ta paisa metetdaktsü.
Dimapur district nung registered farmers 16329 lir aser parnok rongnungi aluyimer 14183-i loan agiogo, ta Biswas-isa shisem.