Nübortemi matatetter

Naga yimten nüchiso atema alima tsüngdang ken o süoka jembir joko küm noklang dak tali süir saka Naga nunger nüchi akümer masü saka kar rongsen lar aser kar kima yimdong nung meshimetsür ta küma aoba angur. India government den yimjung nung ken o jembitsü mapangbo lapok saka putu süia nunga keno tembanga mejembiteter. Alima aso 21 bubai aiter külena joko küm 20 ajunger, ajisüaka Naga nunger rongnung telemsa adokba dak alaka India denbo shibai kechi jembiar shingaia memetet. Iba alima aso tenzükdang nungi Naga yimten ken o India den shitak jembia odar ta Nagaland nung yimsüsüremi taolen ajak nung jembiba bilemtetter saka shitakleni aoba to kechileni aoar memetet kümogo. Iba jagi nübortem mangmangteper aser matatetter. Naga nunger kari kechisüdir süaka India kübok malitsü ta o agi asüyonga akangakanga nokdaka lir, kari Naga nunger flag aser temzüng balaka amshidaktsüra India kübok aliyonga kecha masü ta jembir, kari Naga nunger yimten ka kübok alushi aser kin ajak külemi melitetyonga lokti tentet aser sobaliba telongjem ka nung litetra kecha masü ta jembir, ano karibo tang aliba Nagaland state tatar menden-ang teimba akümtsü indang jembir aser Assam, Manipur aser Arunachal Pradesh nung aliba Naga kintem nem yimten tashi talila agütsütsü indang jembir aser ano karibo Nagaland state katang ano Naga kin ajak agi akümba tashi tuluba yimten ka alitsü indang jembir. Atangji, onükbo ka dang, ibaji Naga yimten nüchiso onük, saka telok aika aser yamaji tebilemba aser taginüba o a aika, anungji Naga yimten ken o ya kongang ka atemtsüar shingaia memetetba tensa ka nung Naga nunger shisaboluteper. India goverment tsütsüa ken o ajak tembanga jembiogo tabo shipet ashir saka komala ken o ka renema jembiar, ajibo mashir. Naga nunger asoshi tarutsü jenjang latettsüba indang ken o jembir saka Naga nungertemi memetet. Ibaji, atangji, tarendaktsüka lir. Naga nunger nüchi purtemibo ibaji ataa melitettsü. Tang ama mapang ya shitakba agibo Naga kin shia pei pei sasep nung aser ano külemi longjemer Naga yimten tebilemtsü latettsüba indang ya temulung lapoka shisalemsateptsüba mapang lir. Tang tashibo asenoki Naga yimten tebilemtsü ya Naga nungertemi akümketa agizüktettsüsa latettsüla ta dang jembir aser metetdakja lir. Ibajibo tanurtemi onokbo tamen-tamen dang achitsü bener arujang ta ashiba den kasa lir. Joko, tangbo Naga nungertemia Naga nunger tarutsü asoshi akümketa agizüktettsüba telemtetbaji kechi asütsüla ta olong küma jembitsüla. Ibayongji, yakanü Nagaland nung Goanbura-temi district ajak nung lokti senden ayongzüka agiogo. Iba senden nung jembirtemi Naga yimten tebilemtsü ya Naga nunger lushi ajak yimten ka kübok melongjemtetyonga aser India temzüng küboksa alitsü asüyonga tekaraba nung latettsüla ta metetdaktsüogo. Ibaji Nagaland nung alirtem tangatetba lir. Naga yimten tebilemtsü ya melatetteti komaka menur yamaji, talisa, Myanmar nung alir Naga nungertem timatemer aser Nagaland nung alirtem akoksar. Külen Naga yimten nüchiso indang jembir aser külen Nagaland government kübok tagitsü mapa ajak nung rakteper, ano kari külen India temzüng kübok Nagaland nung yimsü asür aser Naga yimten nüchiso indanga parnokisa jembir ta koba-ang shitak aser koba-ang meshitakar mejangjatet, karbo agir magima saka karbo asentzü alua inyakaka tebok masüng ta Nagaland nung nübortem kangshiba jenjang ka nung lir. Iba ama yimten tensa tia ka nung, Naga nungersa tia majung Naga kin ajak alidak lokti tentet sabang kata maka kümadokba ya asütsü. Ashi, iba ama Naga nunger ratamatatepba tia ka nung alidang, akhi tsüraburtem mapang ama, asenoki danga milen tilaka tsükloka amer Naga nunger lenitsü asoshi ajok ka danga agütsütet asübo, Naga nunger taoba tia dang nungi tang tesü tia tajungba kümtetla. Ashiko, nisungi dang masü saka Tsüngremia asenok dang nungi iba khuretji abentsü imlaa alitsüa akok.