Mopungchuket yimdak nüburtemi ayong ka mürektet

Dimapur, Metsüremi/March 10 (TYO): Mopungchuket yim aser temeket müreka ayutsü tangatetba nung Mopungchuket Baptist Church Youth Ministry ajanga The Greensight Project den lungjemer March 10, 2020 nü Etitzüba müreka liasü. Iba ayong ya anasa aliba yimtsüngtem den arra mali aser ‘reserved’ ayong ka lir.
Iba ayong temürek nung ango aser tzü shiruru tabu aika lir aser süngtong-litong balala lir, koba ajanga iba ayong indang ecosystem temeyoktep nung yarir aser arem shiruru puadaktsür. Iba ayong ya tepour kanga junger aser tzü tsükba tesem pongu shi lir. Etitzüba ayong ya Milak ayong den longteper.
Mongulbarnü iba ayong mürekba sentong nung Youth Ministry, MALT, SHG, Mopungchuket Medemsanger Putu aser Village Council, Mopungchuket Baptist Church, Mejensanger Lanur, Watsü aser temulunger ajak agi nisung 153 shilem agia liasü.
Iba ayong ya kilometer pezü talang lir aser volunteer telok asem küma lemsar mürekba mapang jana metric ton 2.7 shi bendena liasü. Item jana ya shilem 60 shi ola-angla, shilem 30 plastic pet bottle aser tanüngba ya ‘multi-layered packaging’ aser tanga janatem liasü.
Iba sentong nung shilem agir aser yimdaklirtemi iba ayong müreka yua temürektiba jenjang nung wazüka ayutsü tenangzüktep agi. Iba ama mapa tajung inyakba ajanga lokti aser nübur ajangzükba osang bener shilem agirtem kidangi ao.