Nagaland technical institutions nung Smart Boards amshitsü

Kohima, March 10 (TYO): Nagaland sorkar college ajak nung Smart Board amshitsü tenzükba sülen hopta ka lir Department of Technical Education-ia tanü technical institutions ajak nung Statewide Interactive Smart Board sayaogo.
Hombarnü Government Polytechnic Kohima nung Higher Education, Technical Education and Tribal Affairs Minister, Temjen Imna Along lia All India Council of Technical Education (AICTE) Chairman, Anil D Sahasrabudhe-i Smart boards sayatsü.
“Asen loktiliba nung khuret aika agi kangshir aser kija renlokba dak alia technical education-i technology amshia loktiliba tajungba kümdaktsütsü” ta Dr Sahasrabudhe-i tanü o jembidang ashi.
India nüjiso anguba sülen higher education system kanga renlokogo. Ajisüaka, asenoki quality nung temulung kanga magütsür aser iba jagi graduate tem mapa manguba khuret ajurur, ta paisa ashi.
“Asenoki technical education kaketshirtem aser tesayurtem temulung uludaktsütsüla aser iba atemaji asenok tajungba akümtsüla. Technical education indang curriculum ya industry-i aginüba ama majungket lir. Asenok Putu 21 buba nung alir saka kaketshirtem dang Putu 19 buba indang sayur” ta Dr Sahasrabudhe-isa metetdaktsü.
“Engineering, architecture aser polytechnics ama higher education nung mapang shia curriculum meyipa reprangshitsü nüngdaker. Tesayurtem ya kanga junga angartem asütsüla. School nung shisaliokji coaching aser tuitions menüngdaktsüsa kanga junga sayutsüla” ta paisa ashi.
“Technology tajung agütsü yonga, senotsü aika endokyonga aser sayu yonga nisung kati jangrabangra mezüngra takok mangutsü” ta Minister Along-ia ashi.
Technical Education, Nagaland Director, Arjun Singh-ia ashiba agi “department-i quality education tajungba kümdaktsütsü atema süoki ia bilema inyaker aser National Board of Accreditation atema AICTE guideline nung aliba ama Khelhoshe Polytechnic Atoizu aser Government Polytechnic Kohima accreditation mapa tenzükogo.”
Nagaland state anguba sülen nungi engineering college ka danga mali, aser iba jagi department-i Khelhoshe Polytechnic aser GPK ya engineering college kümdaktsünür, ta paisa ashi.
Iba sentong nung Commissioner & Secretary Imjung M. Panger-i tesentepertem pelaa agizük, KABA pastor Tiatoshi Longkumer-i sarasadem aser GPK principal K Rhütso-i anküp tepela o jembi.