India nung coronavirus aketer teimba akümer

Bengaluru/Kochi/New Delhi, March 10 (Agencies): Mongulbarnü Kerala health department-i parnok state nung nisung 8 dak coronavirus aliba putetogo ta osang metetdaktsü. Iba ajanga tang tashi nung Kerala nung nisung 14 jungogo.
Maneni, Karnataka aser Pune nung nisung asemsem dak coronavirus aliba putetba osang sangoktsü.
Union Health Ministry-i item kuli ano mejangjatet lir saka coronavirus alibaji shitak süra, India nung nisung dak 50 tema iba tashidak puteter asütsü ta parnoki metetdaktsüogo.
Union Health Ministry-i Hombar nikongtsütsü tesüsabuba osang agütsüba nung India nung nisung 47 dak coronavirus putetba shia lir.
Alima tesem balala nung iba tashidak agi Mongulbar tashi nung nisung 4,000 tema asüba osang angazüker.
Italy nung nisung 9,000 den teimba dak tcoronavirus aliba putetogo aser nisung 453 tashi shiranga süogo. United States nung nisung 700 tema dak aliba putetogo.
Mongulbarnü Kerala Chief Minister Pinarayi Vijayan-i osangbener dang ashiba agi “state nung ano nisung trok dak coronavirus aliba putetogo. Parnok trok rongnung ana dak tanü virus aliba putet aser tenaji Medical College, Kottayam indang isolation ward nung yua lir. Ano nsung ana Kozhenchery nung taluk hospital ka nung anepaludar.”
Kozhenchery nung shiranger anaji Italy nungi aruba kibong den külemi aliba ajanga menaba lir, ta paisa ashi.
Kerala nung nisung 1,116 tashi observation nung yua lir. Parnok rongnung nisung 965 home quarantine nung aser 149 isolation ward balala nung lir, ta Chief minister-isa ashi.
CM Vijayan-isa nübortem dang health department ketdangsertem den yariteptsü metetdaktsü.
Mongulbarnü Karnataka nung nisung asem dak COVID-19 aliba putetba sülen iba tashidak agi shiranger nisung pezü kümogo.
“Bengaluru, Karnataka nung nisung 3 dak virus putetogo” ta Indian Council of Medical Research-i tanü metetdaktsü.
Par asem rongnung arishi küm 50 tain tebur ka tawa tu US aser London-i orr aruba liasü.
Tanüngba nisung anaji software engineer ka kinungtsü aser jala na lir. Iba software engineer ya March 1 nü United States nungi meyipa aru aser Karnataka nung pa dak mezüng COVID-19 aliba putet.
“Karnataka nung nisung pezü dak COVID-19 aliba putetogo. Parnok kinungertem isolation nung yua lir aser health ketdangsertemi jungjunga anepaludar. Iba tashidak mebelenshitsü atema nübortemi kümdanga alitsü mepishir” ta Health Minister B Sriramulu-i ashi.
Karnataka Chief Minister BS Yediyurappa-ia iba dak sendakba nung rongdak senden ka ayonga menogo.
“District ajak nung Coronavirus oversight committees shimtsü. Sorkari iba tashidak azüoktsü renema lir” ta Yediyurappa-i osangbener dang ashi.
Maneni, IAF-i Iran nungi India nunger 58 anir aruogo. Coronavirus agi kanga mejungi kongshiba linüktem nung Iran dena lir aser tanü tashi nung nisung 237 tashi iba tashidak agi süogo.
Tanep 10:00 ako meta IAF tayimtsü ka nung Iran nungi temeshi aini aoertem aser kaketshirtem anir aru.
Iran nungi anir arurtem ya Hindon nung quarantine facility ka nung anogo 14 nü ayutsü.
External Affairs Minister S Jaishankar-i Iran ketdangsertem, Iranian Embassy aser IAF dang pelaba metetdaktsü.