Mokokchung DC-i totuyuba agütsür

Dimapur, Metsüremi/March 12 (TYO): Deputy Commissioner, Mokokchung, Limawabang Jamir-i Mokokchung district nung pharmacy aser dokan ajak dang surgical mask aser hand sanitizer tem nung sen tali temloker mayoktsü totuyuba agütsüogo.
Iba maparen dak sendakba nung office dangi ashishitepba ken o kar danga benokra süoki ia agitsü aser ozüng agi melaba ama tapet temerenshi agütsütsü. Linük aika nung coronavirus tashidak poktetba mechi tetsübu agi item osettem lijaliyongba mapang nüburtem makoksatsü mechi iba totuyuba ya agütsür, ta sangdong ka ajanga ashi.
Iba amala ashishitep ken o kar danga lira nüburtemi Inspector, Mokokchung Municipal Council den mobile number 9436601051 ajanga tongteprateptsüla, ta kasa sangdong nung shia lir.