Nokmachier L. Jamir-i Samarthya Award 2020 takok angu

Dimapur, Metsüremi/March 12, 2020 (TYO): Iba alima nung nisung shia dak sempet balala keter tetsü pok nungi alu. Iba den külemi kija shiadak Tsüngremi moatsüba sempet balala keta lir.
Item rongnung, Ungma yimdak nungi asür Mr. & Mrs. Limatoshi Jamir’er jabaso arishi küm 23 tain Nokmachier L.Jamir ya ka asütsü. Nokmachir ya asodang nungi tenarong tajak liasü, anungji mezüngbo pa ya tangaleni mao par yimdak kidang dang lia intet.
Narongjakertem atema Deaf Biblical Ministry, Dimapur reju aliba angazüka, pai iba reju nungi takok tajung ngua HSLC tatidang ajangtet. Pa temang nung iba ama timtem liakasa, angazüktsü asoshi pa dak tejangraba tulu liasü. Fine arts (noksa yanglutsü) sempet tajung aliba atema ajaki pa tali jangjaa aküm aser temaba jenjang ajangzüktet.
Pa dak iba sempet aliba ajiteta, 2019 küm matamabensar tem atema Hornbill Open Art Competition nung pai first runner-up jenjang nung sempet ngua liasü.
Municipal Affairs Department, Govt. Of Nagaland ajanga tenzüktsüba Pradhan Mantra Awas Yojana kübok state level wall painting tetoktepba nunga Nokma-i shilem agia liasü. Art tsütsü pa dak sempet tajung aliba ajiteta Bangalore nungi Samarthya Award Committee, Caritas India (CI) CBR Forum ajanga pa nem Samarthya Award agütsüogo.
Samarthya Award ya küm shia ayongzüka agiba sentong ka lir, kong Persons With Disabilities (PwD) mesüra Children with Disabilities (CwD) nung pa mesüra la dak sempet tajung aliba ajiteta iba award agütsür. Taküm iba sentong ya 07/03/2020 Honibarnü, Lemon Tree Hotel, Electronic City, Bengaluru, Karnataka nung ayongzüka agiogo.
Nokmachier ya DPO Ungma kübok züngoksema lir aser iba ya Care & Support Society, Mokokchung kübok CBR project ajanga repranger. Nokma dak semept aliba ajanga pa ama külem medemertem ajungmesor aser pa maparen ajanga aazükbatem yagi par kidang teyari shilem ka agütsür. Pai ano maneni azüngtsü aser iba den külemi fine arts tsütsü diploma course ka agitsü tebilemba lir.