KSU-i Mon district nung raliwalirtem nokdanger

Dimapur, March 12 (TYO): Coronavirus tashidak prokba anema Konyak Students’ Union (KSU)-i bendanger aser linük naprongla nungi raliwalirtem Mon district telungi aitba nokdangogo, ta Brihostibarnü sangdong ka ajanga metetdaktsü.
KSU Tir, Bumang Phaiba aser tongti tezülur, Phoe Konyak nati sangdong ka ajanga, Mongolbarnü rongdak senden ka amenba mapang nung district telungi raliwalirtem aitba nokdangtsü atema telemtetba agia liasü, ta metetdaktsü.
KSU-isa ozüng amertem aser district administration danga iba tetuyubaji benshitsü aser mita atatsü mepishiogo. KSU-isa, talisa Aoleang benjung atongtsü lia nüburtem kümzüka alitsü atema raliwalirtem district telungi aitba mita atatsü mepishia metetdaktsü.
Union-isa state sorkar dang iba tashidak nokdangtsü atema mera balala agia inyaktsü aser district nung aliba medical staff ajak peipei posting tesem nung lidaktsütsü atema inyaktsü mepishia metetdaktsüogo.
KSU-isa nüburtem dang, tang ama tensa ka nung tanga district, state aser bendang linüktemi maotsü tekümdangtsü metetdaktsü.