Tatongokdak Akatsüsa Sayutsüla

Nagaland nung tazünger timba-timba akümer, yamaji mapa manguba tebilemtsü-a tuluba akümer. Kibong shia nung tazüngtsü tashi zünger kecha nunga tatongokdak makai tsüraburtem nem mesüdakja alir lanur jenti kümogo. Chirnurtem tazüngba mapang nung rongsen jenti indoker züngdaktsür joko tsüraburtem anisüngzüktsü mapang süaka chirnurtem mapa manguba aser kibong makümba tebilemtsü khuret abener tsürabur jenti lir. Lanur aikati pei azüngba yari mapa aginer saka tanü putu nung joko sorkar mapa angutsüji pongmang kümogo. Tazüngbo azüng saka tatongokdak maka, training bo agi saka kecha inyak mashiba lanurtema aika lir. Iba ya asen lima nung shisaliokim (education system) tai asü, ta meyipa reprangshitsü nüngdaker. India nung industrial putu jakdang kibong shia nung tanurtemi mapa balala angazüka tsürabur tsüngü nung anidaka inyaka aruogo. Ajisüaka tanü putu nungbo kibong shia nung tanur ajak züngdaktsür aser tazüngtsü tashi azüngba sülen mapa tajung (white-collar job) aginüa bushir, saka mengura aikati aayangba mapa inyaktsüsa akümer. Ajioda degree balala ngur mapa manguba dang nungibo skill training balala agir teka mapa ka nungbosa mongin küma langka nungbosa tatongokdak akaba tajungba asütsü. Ibayongji India sorkaria school curriculum nung vocational training agütsür aser teka mapa balala angazükdaktsütsü atema National Skill Mission nung temelung agütsür. Germany nungbo tesayurtemi school nung tanur ka dak sempet aliba asadanger temaba shisaliok bushitsü tuyur mesüra vocational stream agitsü tuyur, asenoka yamaji inyaktsü mapang tongogo ta bilemer. Nagaland nung mapa manguba tebilemtsü ajanga Naga nunger lanurtem aika state adener tangalen yimti balala nung inyakdar, aser ano aikati yamaji tangalen inyaktsü jangrar. Oda pei lima nungsa mapa inyaka aliba tajungba, ajisüaka pei lima nung kecha meinyaki aliba dang nungibo timtem liaka tangalen inyakbajisa tajungba asütsü. Ano külen sorkar mapa mebushiaka asen state nung aseni inyakettsüsa teka mapabo jenti lir. State balala nungi tzümartem aika pei kibong yutsür yangi Nagaland nung aruagi mapa tilateri inyaka kibong mesür jenti lir; parnoki inyakba mapa timbaka asenokia inyaktet, saka meinyaker. Northeast nung aliba state tem nung kisüjensü mapa inyaker tzümar kar dak alaka local nisungtemi dang shishilembaba aser tilateri mapa ajak inyakba state jibo Mizoram dang asütsü. Ano külen süoshi dokan, chiyungtsü aser electronics dokan lapoka alirtemji timbaka Mizo tsürtem lir. Mizoram nung local nisungtemi shishilembaba aser mapa balala inyakba ajanga tzümartem aayangdak makai akümer; iba tangatetba nung Mizo nunger lenirtemi lanurtem nem training agütsüba den lenmang balala sayua mapa inyaktsü ajungshir. Mizo nungeri inyakba ama asen Naga nungeria joko sorkar mapa dang meimlai shishilembaba aser teka mapa balala inyaktsü mapang tongogo. Tarutsü nung langka nungbosa atongoka pei akok mapa inyaktsü atema lanuwayongi school nung tanur shia nem tangatetba shisa agütsütsü nüngdaker aser vocational studies nung taliba rangloktsü mapangi sempeter.