Mon nung temesepba mozü amshir tetsürtem atema sentong ayongzük

Mon, Metsüremi/March 13, 2020 (TYO): “Monghüm” omen nung ajemdaker Hokolbarnü Mon nung temesepba mozü amshir tetsürtem atema Konyak Union indang Committee on Drug Abuse, Mitigation and Prevention (CoDAMP) ajanga sentong ka ayongzüka liasü, ta sangdong ajanga metetdaktsü.
Konyak oshi nung “Monghüm” tetezü “Teimla” lir. Iba project – “Monghüm” ajanga tetsürtem ya shisatsü, tanela aser rongsenkettsüng tsütsü lokti nung tanaben anioktsü merangtsü.
Lokti nung item tetsür tanaben anioktsü asoshi mezüng mera agia, March 12, 2020 nü Mon Town nung temesepba mozü amshir tetsürtem atema Group Counseling ayongzük.
Iba sentong nung shisalen sayurji Rev. Dr. Ellen Konyak Jamir, Associate Professor of Pastoral Counseling & Psychotherapy, Oriental Theological Seminary, Dimapur liasü. Iba counseling session ya Konyak Baptist Bumeinok Bangjum (KBBB) Conference hall Mon nung ayongzüka agi, kong tetsür 12 agi shilem agi aser sentong ya Beti Bachao Beti Padhao District Task Force den longjemer sponsor süa liasü.
Konyak nunger lokti tentet balalai “War on Drugs” sangdongba dak sendakba nung temesepba mozü amshir tetsürtem iba talenba nungi anitettsü nükjidong nung iba project tenzükja liasü. “War on Drugs” ya lokti ajungai shilem agiba mapatong ka kümogo, koba Committee on Drug Addiction Mitigation & Prevention (CoDAMP) tekolak ser achaayanger. CoDAMP ya Mon district nung tentet temabai shima liasü. Iba counseling ya “Women in Recovery” omen nung ajemdaker agiogo.