Mokokchung nung nüngdakba oset peria lir

Dimapur, Metsüremi/March 16 (TYO): Mokokchung nung COVID-19 tashidak tetsübu agi nüburtemi osettsüset alitepba ngua MCCI ajanga sangdong ka nung, totzü aser mozü dena nüngdakba osettsüset peria benoka yua lir, ta nüburtem nem metetdaktsü.
Olulu kar prokshiba jangjashija MCCI-isa ashiba agi, Mokokchung-i nüngdakba osettsüset abenba garitem akhi ama arudar.
Maneni MCCI-i shishilempartem dang, osettsüset aser talisa mask aser hand sanitizer tem market price dang temaba nung mayoktsü metetdaktsü aser aibelenertem merenshitsü, ta ashi.
Iba den külemi, sorkari tuyuba ama MCCI sentong renema aliba ajak thinena atar, ta MCCI züngsemtem danga metetdaktsüogo.