Shirangra koda ?

Tang ama alima ajaklen tashidak wara tesashi agi nisungtem amokmeren dang asenoka iba ama tashidak tamajung nung jagi jenbua alitsü atema kanga kümdanga alitsübaji kanga tongtibang lir, kechiyong taküm ya, tang amai wara maliyonga, tekümdang agi kümdangzüka alir. Tsüngremi asenoksa temeimba meimerji, pi tashitemetet aser takar lima China, America aser Europe limatem nung Coronavirus tashidak agi anogo shia nisung süpet süaka, tang tashi nung Naga lima nungbo iba tashidak agi shirangba kata puteta mali. Ibaji tesüngmangtsü taochi mapang ka asütsü. Iba ama mapang nung, iba tashidak nungi kümzüka alitsü asoshi temang anema alitsü atema len sayurtemi ashiba ama, teti sapon tajung amshia teka metsüktsü, haji dang teni tebang nembangtsü, shi aser entsü ama chiyongtsü jungjunga mena sor dang achitsü aser iba tashidak agi shirangertem anasai maotsü aser mekongshitsü. Iba tashidak agi atongba tamaitsüji tango sadema mesashitettsü, akettsü aser temang metatsü. Atangji, iba tashidak agi shirangertem ajak asütsü tabo masü, kechiyong mozü tejangja ka bushiteta meliaka, mapang shitak nung anepalu tenzükra jungadoker.Coronavirus ya shiruru dak nungi nisungtem nem menaloktsüba tashidak ka lir saka tangbo nisungtem rongnung menatepa aoer. Iba jagi, kodang iba tashidak agi tongdir, pa mesüra laji shinga dena majurutepdaktsüi mozü kidang takdang balaka nung yur anepalur. Iba ama tashidak wara agi khen tongerbo tanep tasak asünungji, tamasayongi iba tashidak agi metongdaktsütsü merangtsübaji kanga tongtibang lir. Ibayongji, Nagaland nunga dena tanü nungi kaketreju ajak hopta pezü asoshi shibangogo aser Nagaland süngküm shia nung tangalen nungi arurtem dak iba tashidak mesen keta ali asü maliar mita reprangtsü tenzükogo. Iba denji külemi bendanglen nungi raliwalirtem marudaktsütsü asoshi nokdanga lir. Aji oda, iba tashidak wara marudaktsüi nokdangtsü asoshi state government-i tim teinyaktsü mapatem reprangteta inyakdagi. Ajisüaka, shisabolutsü kaji, nokdanger menokdangtet iba tashidak wara agi asenok dak tongra koda asütsü ? Shirangertemji kong yur koma yaritsü ta shisabolua bilemer. Nagaland nung government mozü kitem reprangdangra, Coronavirus tashidak ama agi atonger, tangar shirangertem den külemi mesüi takdang balaka nung yur anepalutsüsa takdang peria maka. Ibaji dang masü saka mozü kitem teimabaka kanga memerük, kilentsü aser metsümeshidak nungi adokba teshinem agi mozü ki telong nung dena menemer, yipten sü tajung maka aser mesen asütsü mozützü amshia anogo nung asemben pezüben shidoka meyutsü melen tzü kisüng agia anogo nung kena meshidokba mozü kitema Nagaland nungbo alitsü. Ashiko, Nagaland nungbo coronavirus tashidak ama ya tanga bendang limatem nungi menar arutsüba masü saka asenok shirang aneptsü yangluba mozü kitem nung amongertem dakang tama atongtsüa akok. Nagaland nung tangaria dena temulung melemtettsüsa inyakba kulitem rongnung government school nung tesayurtem chirnurtem shinga government school nung mazünger aser government mozü kitem madak ketdangser aser mozü kidang inyakertem shirangba mapang government mozü kidang mamonger. Aji oda, jungjunga bilemdangdi süra, government mozü kidang inyakertem shirangba mapang private mozü kitem nung amongba jagi government mozü kidang taneptsü angutsübaji teratatsü mapa ka kümdaktsür. Iba ama tia ka nung, tang ya coronavirus agi Nagaland nung meyirijang junga shirang nungbo, koba mozü kidangang itemji anepalutettsü ta shisabolua aiter. Tang ama tashidak wara tamajung agi China aser US tirtem dena shisabolutsüsa atalokba tensa mapang yagi asen lima nung yimsüsür, ketdangsertem aser nübortem ajaki government mozü kitem ajak ya asenok taneptsü angudak ta tali terajemba nung mozü kitem ajak mozü ki mesüka ayu tenzüktsüla. Idangjibo, kechi tashidak arudir arung asenoki Tsüngrem tenüng nung nokdangtettsü aser asenok government mozü kitem nung shirangertem anepalutettsü.