Discipleship Bible College nung DMin amenokogo

Dimapur, Metsüremi/March 18 (TYO): Christian ministry atema professional skills ajungkettsü aser Aorgo nung tenzükertem wadang (ministry) balala atema renemtsütsü asoshi DBC Programme for Theology and Cultures in Asia (PTCA) den tenangzüktepba ka yangluogo.
PTCA dean Dr, Wati Longchar-i, joint Doctor of Ministry (DMin) programme ajanga lenritem senpet ajungkettsü aser Asia resources den theology inyaktsü tashi itshitsü. PTCA ya 1083 küm tenzükba theological movement ka lir aser mezüngbuba dean ji Taiwan nungi nüngtugu theologian S.C Song liasü. PTCA-i parnok indang programme tem “PTCA Partner Institutes” ti den sendakteper inyaker kong Department of Research/SATHRI, Senate of Serampore College, Association for Theological Schools, Myanmar, Association of Theological Education, Indonesia, Chang Chung Christian University, Taiwan, aser Sabah Theological Seminary, Malaysia ama rijutem densema lir, ta ashi.
Dr. Longchar-i ashiba agi, DBC ya D.Min degree programme agütsüba partner institution mezüngbuba lir aser PTCA-i kasa sentong tarutsü nung Nepal, China, Cambodia aser Myanmar nung tenzüktsü sentong lir. Lenirtemi nükla yur tenzükba ama creative, contextual aser transformation theological education ajanga Arogo aser lokti asüngsashiba nung teyari agütsütsü imlar.
DMin programme ya küm asem atema non-residential empirically based project-oriented programme ka lir, Programme ya 2020 küm June 1 nü nungi tenzüktsü. International faculty tem rongnung Prof. Huang Poho (Taiwan), Prof. Archie Lee (Hong Kong), Prof. H.S Wilson (USA) densema lir aser Prof. Wati Longchar consultant ama inyaktsü aser Dr. Imsenperong D.Min Studies Dean asütsü shimogo.
Dr. Wati Longchar-i mezüngbuba DBC-PTCA joint public lecture agütsüogo. Pai “Persons with Disabilities in the Church and Society – A Search for Inclusive Community” onük nung ajemdaker jembi. Pai, tebendang maliba lokti ka yangertsü asoshi nüngdakba lemsatep. Madamabensaba ya tashidak ka masü; iba ya mesen ka masü. Iba ya mozü agi teneptsü anguba tashidak ka masü. PwD ka mada mabensa asünunga anema litettsü. Lokti nung abetasong meketi alirtem yimyayimpong ajanga PwD tem kanga kangshir. Loktiliba nung PwD tem sentokba ajanga madamabensa adokdaktsür. Yimyayimpong shidak mebenshiba ajanga mada mabensartem aaker, temenen nisung aser atakatem chir ama bilemer aser temenen inyakyim mesera tamang makangba ajanga ta bilemer. Iba tangatetba ya asen lokti nunga tanga benshir. Asenoki iba tangatetba ya mintok tashi inclusive ministry minyaktettsü.
Maneni Dr. Longchar-i, Arogo temi PwDs tem sentoker ta asenoki ochishia nangzüktsüla. Ajak kasasa benshiba Arogo ka nung mada mabensartema ajak den kasa ama züngshitsü nüngdaker. Bendenlokba tetezü parnok ya tebendang melei agizüktsüla, ta ashi. Phom Baptist Church, Singal, Rev. Mane Phom aser DABA pastor Rev. I Wati Jamir nata iba sentong nung dena liasü.