India nung nisung 151 dak COVID-19 putetogo

New Delhi, March 18 (Agencies): Karnataka nung nisung 13 tashi dak COVID-19 putetba sülen sorkari Bodbarnü malls, theatre, schools aser colleges dena public tesem ajak shibangtsü tetuyuba agütsüogo.
Yashi India nung COVID-19 agi shiranger nisung tasembuba asüba asü aser tanü tashi nung nisung 151 dak iba tashidak aliba putetogo, ta Health Ministry-i metetdaktsü.
Ajisüaka, Noida, Pune aser Bengaluru nung nisung tasen aika dak coronavirus putetba osangtem angazüker aser parnok züngsemra, nisung teimba akümtsü.
Bodbarnü Lok Sabha nung Ministry of External Affairs (MEA)-i ashiba agi “bendang linüktem nung India nunger 276-i COVID-19 menaogo.”
“Parnokji Iran nung 255, UAE nung 12, Italy nung 5 aser Hong Kong, Kuwait, Sri Lanka o Rwanda nung kaka lir,” ta MHA-i ashi.
Alima nung nisung 8,000 tema iba tashidak agi süogo aser nisung 200,000 den teimba dak puteta lir. China nung nisung 82,000 dak COVID-19 aliba puteta lir, parnok sülen Italy nung nisung 27,980 aser Iran nung 16,169 lir.
Alima nung COVID-19 agi kanga mejungi kongshiba linüktem rongnung South Korea dena lir. Tanü-a South Korea nung nisung 84 dak coronavirus aliba putetba osang metetdaktsüogo aser parnok züngsema, par linük nung iba virus alir nisung 8,320 jungogo.