DC Kohima ajanga COVID-19 atema nüburtem dang sangdonger

Dimapur, Metsüremi/March 19 (TYO): World Health Organization (WHO) ajanga Novel Corona Virus (COVID-19) ya alima ajunga sünga prokshiba tashidak ka lir ta sangdongba aser iba den külemi Home Department sangdong nung ajemdaker Deputy Commissioner, Kohima, Gregory Thejawelie NCS-ia nüburtem dang iba tashidak nungi kümzüka alitsü aser azüoktsü asoshi teinyaktsü kar sangdongogo.
Nüburtemi kidang aser nübur meyong tesemtem ajunga nung pei sasa mürekmejua aser temng müreka alitsü Kohima DC indang sangdong nung shia lir.
Nüburtemi lokdi adenshiba nungi pilaa alitsüla aser tongtibang masüba sentongtem, talisa seminar, workshop, mungdang amala thinentsüla; kasa mapang nüburtemi tetsübu agi osettsüset alidenba nungi pilaa alitsüla, kechiaser nüngdakba osettsüset peria lir, ta ashi.
COVID-19 dak sendakba nung teyari agitsü aser osangtsüsang metettsü asoshi nüburtemi Kohima District Helpline No. 8837093602/7005464959 ajanga tongteprateptsü akok.
Kaketshirtem dena nisung shibasa Nagaland alema oa azünger school aser college tem shibangba ajanga state telungi aita lir, parnoki Helpline No. 7005415243/9856071745/7005939653 mesüra Health and Family Welfare Department, Government of Nagaland indang nissu.idsp@nic.in den email ajanga tongteprateptsüla, ta sangdong ajangasa ashi.