Nukmen Baptist Arogo-i Coronavirus indang awareness agütsür

Dimapur, March 19 (TYO): COVID-19 ta ajaba Coronavirus wara kanga bulua prokba atema tebilemtsü kaa Nukmen Baptist Arogo (Ao Baptist Church), Darogapathar-i iba tashidak indang awareness agütsütsü aser iba tashidak nokdangtsü atema mapatong balala tenzükogo, ta osang ka ajanga metetdaktsü.
Iba Arogo kübok Social and Environmental Concern Committee lenisüba nung züngsemtem aser Arogo nung toklang tenzükertemi Tenla ki temeket ajunga sanitise süa liasü.
Iba Arogo nung pastor, Kilang Longkumer-i, Coronavirus tashidak indang olulu, taila osang aser shidakba osangtem ajanga tamangertem tsübutepba aser ratamataba tensa ka nung iba Committee-i campaign balala tenzüktsü lemteta liasü, talisa Bodhbarnü (March 18) Tenla ki temeket ajak sanitise süogo, aser iba ya temelungjang nung tetsübu indoker Tsüngrem O nung ranglokdaktsütsü atema lir, ta metetdaktsü.
Iba mapatong ya tekülem sentong agiba anogotem- Bodhbar, Honibar aser Amongnütem shia nung inyaktsü, ta paisa metetdaktsü.
Tenla ki, Sunday School, Children Worship Centre buildings aser Arogo nunger bus ajak mapang shia sanitise asütsü. COVID-19 tashidak ya tanurtem talisa menatsü, anungji committee-i Sunday Scoool tanurtem nem junga design sütsüba stickered masks agütsütsü.
Tekülem agiba centres aser Sunday School nung teka metsükba facilities aser hand sanitizers agütsütsü. Arogo züngsemtem aser Darogapathar nung alirtem dang teka metsükba techniques-a sayutsü. Iba tashidak indang awareness agütsütsü atema tongtibang tesemtem nung Posters aser placards yutsütsü.
Pastor, Kilang-isa, osang tai prokba nokdangtsü atema Arogoi sorkar aser tanga agencies den yariteptsü, ta metetdaktsüogo.