Fakim, Thanamir, Dziileke nung raliwalirtem nokdanger

Kohima, Metsüremi/March 19 (TYO): Fakim aser Thanamir nung alitem kümzüka toktsütsü asoshi Fakim aser Thanamir Ecotourism Board den Village Council-i March 20 nü nungi tenzüka tourist inyakyim ajak khen atema nokdanga atatsü aser Fakim o Thanamir yimtsüng telongteti domestic, international aser local raliwalirtem shinga marudaktsütsü telemtetba agiogo. COVID- 19 prokshia aoba nokdangtsü nüngjitong nung iba tlemtetba agiogo.
“Onoki raliwalir aser nüburtem dang onok den teka amteper inyaktsü mepeshir. Metokmeperi asoshi nemjema bilemer aser nisugn ajak senzüsenpongtsü sadema akümba sülen onoki tesemdangertem pelashishia agizüktsü yongyaa atar,” ta Fakim Village Council Hanruthong aser Fakim Ecotourism Board mendenbuba Tsumongthong, Thanamir village council chairman Tsechimong aser Thanamir Ecotourism Board mendenbuba Tseseki nungeri külem sangdong ka ajanga metetdaktsü.
Maneni COVID- 19 prokshia meyoki nokdangtsü asoshi aser nüburtem ajangzüktsü atema Dzüleke yimtsüng aser Dzüleke Ecotourism Board aser Dzüleke Village Council-ia tensa süngjema maküm tashi parnok litsüi domestic, international aser local raliwalirtem shinga maitdaktsütsü asoshi telemtetba agiogo
March 20 nü nungi tenzüka osang magütsü tashi iba tetuyuba sülen anidaka atatsü, ta Dziileke Village Council chairman Vitsipielie aser Dziileke Ecotourism Board mendenbuba Avi Khate nati sangdong ka ajanga metetdaktsü.