Principal Secretary-i jungdak senden ka ayongzüka amen

Dimapur, Metsüremi/March 19 (TYO): Principal Secretary and Home Commissioner Nagaland, Abhijit Sinha, IAS lenisüba kübok COVID-19 dak sendakba nung Special Action Group pur March 19, 2020 nü New Secretariat Conference Hall, Kohima nung jungdak senden ka menogo.
Senden nung Home Commissioner-i COVID-19 pokteter aliba aser iba ajanga alima dak koda kongshir iba indang tatsü agi metetdaktsü. Paisa, linük balalai iba tashidak koda prokshia aoer iba indang metetdaktsü. COVID-19 ya mesen tasen ka lir aser tang tashi nung vaccines kecha nguteta mali, aser mesen anema raratsü asoshi pei sasa merekmejua alitsü aser prokshia meyoktsüba dak alaker tanga lenmang kecha mali, ta pai ashi.
Paisa, Nagaland aser North Eastern State tem nung tang tashi nung iba tashi keta alir ka danga poteta mali aser state sorkari iba tashidak nokdangtsü asoshi takok tashi jenjang tapet agidar, ta ashi. Maneni Dimapur Airport dak alia railway station aser entry point balala nung passengers tem asadang tenzükba indang pai metetdaktsü. Pai, merekmejuba yimya aser aketba, hajiba, handkerchief amshiba amala respiratory etiquettes benshitsü, lokti nung nisung o nisung na tsüngda tepila ayutsü, COVID-19 helpline den teyari aser screening atema tongteprateptsüba amala yimyatem nüburtem nem metetdaktsütsü asoshi faith based organizations puri tongtibang shilem ka agitsü ayongzük.
Abhijit Sinha-i ashiba agi,iba mesen ya kanga kara menateper aser lokti senden aser nisung aika sentepba tesemtem nung nung mela mela prokshia aotsü ta shia tashidak menatep meyoktsü asoshi iba tesendaktep raksatsütsüla ta ashi. Pai, lokti tentet ajak dang tashidak mazüoktet tashi senden ayongzüka magitsü ajungshi.
Kasa mapang nung Principal Director, H&FW, Dr Vizolie Suokhrie-i, merekmejua maliba ajanga mesen kanga kara prokshia aoer ta shia sentepa alirtem dang parnok züngsemtem dang merekmejua alitsü asoshi osang agütsütsü ayongzük. Paisa, yimra agi tonger alir aser akhetertem pei kidang nungi mainshi alitsüla aser takaratiba nung temang tendangtsüla, ta ashi.
Vizolie-i, state sorkari iba tashidak prokshia meyoktsü asoshi inyakdar ta shia faith based organizations dang iba tashidak den raratsü asoshi sorkar den teka amteper kati ka nongitteptsü ayongzük.  Vizolie-i, state sorkari iba tashidak prokshia meyoktsü asoshi inyakdar ta shia faith based organizations dang iba tashidak den raratsü asoshi sorkar den teka amteper kati ka nongitteptsü ayongzük.  Kohima Town Baptist Pastors Fellowship tir Rev. Kevichalie-i, state sorkari state nung iba tashidak prokshia meyoktsü asoshi jenjang tapet agiba atema parnok nem tenüngsang agütsü. Paisa, COVID-19 tashidak pokteter aliba ajanga Easter Sunday anepdang Kohima World War II Memorial nung anüdok sentep agia aruba taküm küm atemabo thiogo, ta metetdaktsü.