Odisha nung Arogotemi Amongnü tekülem sentong magitsü

Bhubaneswar, March 19 (Agencies): India nung novel coronavirus tashidak bulua prokba nokdangtsü atema Odisha nung Arogotemi March 31 tashi Amongnü tekülem sentongtem magitsü telemtetba agiogo, ta osang ka ajanga metetdaktsü.
Cuttack nung aliba Arogo aser state nung Arogo tulutem rongnung ka- Odia Baptist Church aser Bhubnaneswar nung Church of Christ nati tekülem sentongtem ajak thinena atatsü, ta sangdongogo.
Berhampur nung Odia Baptist Church (CNI) aser Khurda o Jatni na nung Arogotemia kasa telemtetba agiogo.
State nung tongti Arogotem nung Amongnü tekülem sentongtem nung nisung 500 shi dang arur, ta osang ka ajanga metetdaktsü.
Cuttack nung aliba Odia Baptist Church nung President, Lal Mohan Roul-i, “Iba tensa ya onoki süoki ia agir aser ketdangsertem den akokba tashi amalitepa inyaker,” ta metetdaktsü.
Church of Christ secretary, Paresh Das-ia coronavirus tashidak nokdangtsü atema lokti paidoktsüla, ta ashi.
“Tekülem sentongtem nung sarasademtsü atema nisung noklang aika adenshir. Iba ama tensa ka nung lokti paidoktsüji tasak,” ta paisa ashi.
“Church Board-i tanga lenirtem den jembiba sülen March 31 tashi tekülem sentongtem ajak thinena atatsü sangdongogo, saka iba anogo (March 31) sülenbo iba telemtetbaji tanaben reprangshitsü,” ta paisa metetdaktsü.
Odisha nung Khristan nütsüng lakh 8.97 shi lir aser state nung Khristan nütsüngji shilem 2.44 shi dang lir.
Tang tashi nungbo Odisha nung nisung ka dak dang iba tashidak putetogo.