Police Dept. nung tim mesüi shimokba ya tebilemtsü onük ka lir: JDU

Kohima, March 19 (TYO): Police department nung tim mesüi nisung shimokba, talisa police 944 shimokba osang Nagaland nung osangkakettem mezüngbuba tapak nung sangdonga state nung senso tajung ajak jashidaktsüogo, ta Brihostibarnü Publicity Wing, JDU Nagaland-i sangdong ka ajanga metetdaktsü.
“Police nung screening test junga magii mashimashie nisung tali shimokba ya tebilemtsü tuluka kümogo, kechiyong nüburtem nem security agütsütsü atema parnok nem mapa lemzüktsür. Joko küm aika uniform agiba department nung kuli balala ajanga tim mesüi nisung shimokba ajanga timtemer, saka item kuliji azüoktettsü akok,” ta JDU sangdong ajanga metetdaktsü.
“Police nung shimoktsü atema atangji tashi agüja alirtemji Unit Commanders lir, anungji public-ibo parnok ang aitsür, ajisüaka atangji nungbo parnok dang nungi temaba ketdangser aser yimtenren nung lenirtemi parnok nem tenokdangbatem agütsür. Iba kuli ya ajanga JDU Nagaland-i manifesto nung Police Recruitment Board temeja ka alitsü atema shia lir, koba ajanga iba tsütsü ochishia inyaktsü,” ta kasa sangdong nung shia lir.
“Yamaji meinyaktetra Unit Commanders nem shimtsü atema agüja aliba tim tashi agütsütsüla aser iba tashiji tim mesüi amshira temerenshi tulu agütsütsüla,” ta parnokisa metetdaktsü.