Deobarnü ‘Janta Curfew’ alitsü, tetsübu nung lijaliyong masütsüla: PM Modi

New Delhi, Metsüremi/March 19 (Agencies): Alima ajunga nung coronavirus tashidak prokshia India nunga nisung pezü taküm agir nisung 173 dak iba tashidak puteta aliba mapang India Ato Kilonser Narendra Modi-i Brehostibar aonung linük den jembiogo.
“Iba tensa tamajung yagi nisung meimchir ajunga dak kongshiogo. Tesüiba ita ana jakdang nungi asenoki alima tesem ajunga nung coronavirus tashidak prokshiba osangtem tsübuseta aser shisabulua repranga arudar,” ta Modi-i ashi.
“Coronavirus agi kongshiba ama World War I aser II agi linüktem nung mokongshi. Tesüiba anogo ishika asenok coronavirus nungi kümzüka lir ama liasü. Iba ama amangbaji tai lir. Anungji India nunger ajaki iba tashidak meteta aser kümdanga alitsü kanga tongtibang,” ta PM-i linük den jembiba mapang ashi.
“Alima ajunga sünga prokshia aliba iba tashidak wara den raratsü asoshi lenmang bushitettsü aser tazüokba alitsü kanga tongtibang. Coronavirus den raratsü asoshi central aser state sorkari teinyaktsü osangtem sangdongba sülen nüburtemi tashi angaa anidaktsüla. Asen sasa asen kümzüka aser temang junga alitsü asoshi tazüokba alitsü tim. Aruya aliba anogotem nung nüburtemi nüngdakba mapang dang kidang nungi ayazüktsü ni mepishir,” ta Ato Kilonser Modi-i ashi.
Paisa ashiba agi, “Iba ama mapang ka nung ‘mantra’ ka agi dang mapa inyaker – ‘Asenok anema alidang alima anema alir’. Asenoki lokti nungi pila alitsüla aser kidang alitsü nüngdaker. Tang coronavirus tashidak tensa nung lokti nungi pilaa alitsü ya kanga tongtibang lir. Nai na anema lir ama aser nüdak kecha masütsü ama bilema lira, ibaji tai lir. Yamaji inyakba ajanga nüsasa na atema aser nür kinunger adianutem atema aibelen mapa inyaker.”
“March 22 nü anepdang 7:00 ako nungi aonung 9:00 ako tashi linük nung nübur ajungai ‘Janata’ curfew sülen anidaktsüla. ‘Janta’ curfew takok anguba aser iba mapang ajangshibatem ajanga asenoki timtem koktettsü asoshi renemshitsü. Iba curfew benokba nung yaritsü asoshi NCC, NSS, civil society aser telok balala dang ni mepishir. Anogo ana tsüngda youth services ajungai nüburtem nem iba curfew angatetdaktsütsü ni mepishir. Nisung 10 dangi call süa iba curfew metetdakjang,” ta pai linük ayongzük.
“Iba ama mapang ka nung asenok nem nüngdakba service agütsüba nübur ajak nem iba anogo, March 22, asenoki pelaba lemsatepdaktsüner. Deobarnü nikongdang 5:00 ako nung asenok ajak asen ki kishizüng aser balcony nung nokdaker item nisungtem nem tenüngsang agüja minute pongu teka maa, aoso aser marok amala akoshidi.”
“Tongtibang masüba temang anepalutsü asoshi mozüki sünga madenshitsüla. Tera shirangba atema doctor tem den phone ajanga osang agitepang. Tongtibang masüba surgery ita ka thinenang, aji asünung dang asen mozüki aser health infrastructure tem nung khuret tali magütsütsü,” ta Modi-i ajungshi.
“Mapai marurba nisungtem dang nungi taa tajemtsü. Tang amala tensa nung aria bilema inyakang kechiaser parnoka parnok taküm aser kibong kümzüka alitsü nüngdaker,” ta Ato Kilonser-isa ashi.