Nagaland Joint Christian Forum-i March 22 nü sarasadem ayongzüker

Dimapur, Metsüremi/March 20 (TYO): Coronavirus (Covid -19) tashidak kanga bulua prokba ajanga tang alima nung tayongzükba tensa tuluka ajangshia lir, ta shia Nagaland Joint Christian Forum (NJCF)-i March 22 nü iba tashidak atema sarasademtsü ayongzükogo.Dimapur, Metsüremi/March 20 (TYO): Coronavirus (Covid -19) tashidak kanga bulua prokba ajanga tang alima nung tayongzükba tensa tuluka ajangshia lir, ta shia Nagaland Joint Christian Forum (NJCF)-i March 22 nü iba tashidak atema sarasademtsü ayongzükogo.
“Tangalen tatalokba ka dang ama asenoki osangtsüsang ngua aruogo, saka tangbo asenoka tetsübu aser tarendak agi süngogo. Alima tanga tesem nung atalokba tangbo asenok tonga arur. Iba tashidak ya kanga kera prokshidar aser maneni yamaisa prokra linük ka danga mejenbutsü. Asen state nungbo official süa tang tashi nungbo iba tashidak putetba osang mali, ajisüaka taruba anogotem aser hoptatem nung kechi ang ataloktsüar asenoki meteta mali.
Tang asenok terata tensa ka nung lir,” ta Vice President NJCF, Rev. Dr. N. Paphino-i sangdong ka ajanga metetdaktsü.“Iba ama tensa ka nung asenok kanga yakyaka alitsüla aser tim ketdangsertemi tuyuba ama inyaktsüla. Asenoki ketdangsertemi tuyuba ama inyakba denji külemi Tsüngrem dang asenok iba tashidak nungi kümzükang ta sarasademtsüla. Nagaland sorkari tang tashi nung mera tajung agia inyakba atema pelar.
Parnok den külemi asenokia asen teinyaktsü shilem inyaktsüla, kechiyong taneptsü anguba dang nungibo tashidak nungi jenbua alibajisa tajungba. Asenoki asen tashimait aser metokmeperi alibatem atema metokteptsüla saka asenok amalitepa aser nungittepa alitsüla,” ta MJCF-isa metetdaktsü.“Asenoki asen shilem inyakba mapang nung NJCF-i denomination balala nungi Arogo ajak dang Tsüngremi mapa inyaktsü aser asenok dang taochi sayutsü atema taruba Amongnü (March 22) nüji sarasadem aser lumiba anogo ka südaktsütsü atema ayongzüker. Onokisa denomination balala nung tongti office tem dang tekülem agiba tsütsü tekümdangtsü mera balala agitsü mepishir,” ta parnokisa ayongzük.
Sarasadem nung bilemtettsü onüktem (Arogoia onük balala bendenloka sarasademtsü akok):
1. Asen nüburtem kümzükang ta sarasademtsü.
2. Iba tashidak agi kongshia aliba linüktem aser iba tashidak agi shirangertem atema sarasademtsü.
3. Iba tensa koktettsü atema Tsüngremi lenirtem nem shisa tajung agüjang ta sarasademtsü.
4. Iba tensa koktettsü atema renemshiba mapang nung Health & Family Welfare department, doctors aser nurse tem atema sarasademtsü.
5. Iba tashidak agi kongshitsüsa aliba teintet sensotem aser chirnurtem iba tashidak nungi kümzükang ta sarasademtsü.
6. Nagaland adener bendanglen azünger asen chirnurtem aser kidangi meyipa arurtem atema sarasademtsü.
7. Nisung shinga maoksatsü saka shisa kaa tetuyubatem shidak inyaktsü atema sarasademtsü.
8. Tsüngremi alima nung taneptsüba agütsütsü atema sarasademtsü.
9. Iba ama tensa ka nung Arogoi shisa kaa inyaktsü aser amalitepa inyaktsü atema sarasademtsü.
10. Khristantem pei tamang jenjang tashi itta alitsü, aser Tsüngremi taochi sayua asen lima anepjang ta sarasademtsü.
“Kü nübur shirnok Kü tenüng agi jaa lir, parnok sasa ajemaludi süra, aser sarasademra aser Kü jak bushira, aser parnok lenmang tamajung nungi meyipra, idangji Ni kotak nungi angashitsü aser parnok temenen atoktsü, aser parnok lima aneptsütsü,” (2 Putipuyang 7:14)