Home Dept. nung backdoor appointment 994 ya katiang: AKTD

Dimapur, Metsüremi/March 20 (TYO): Home Department kübok backdoor ajanga nisung 994 shimtetba ya tebilemtsü tulu ta angateta Ao Kaketshir Telongjem Dimapur-i (AKTD) sangdong ka nung, tim masüba yimya amshia Department nung aniokba employee ajak indang service katiang, ta ketdangser nem takhanba agütsü.
Sorkar nung temaba menden nung mena alirtemi iba amala tim masüba yimya amshiba aser inyakba mittsü asoshi AKTD-i kaketshir aser lokti tentet balala dang külemi teka amteper nokdaktsü ayongzük.
Zünger mapa mangu aliba lanurtem dang, molungsoa backdoor ajanga mapa bushitsü melena pei sasa pei tetsüng agi nokdaktettsüla, kechiaser iba ama ochimashi mapa yagi asenoki bushiba shisaliok amajok kümdaktsür, ta AKTD tir, Moayanger Jamir aser tongti zülur, Neken Walling nati kasa sangdong ajanga tayongzükba agütsü.
Asen tenük dang lapokra aser asenoki lenmang bushitetra sorkar mapa dak alaka tanga mapa inyaktsü lenmang aika lir, ta AKTD ajangasa ashi.
Tanga-tesüa AKTD-i kaketshirtem jenjang ajungkettsü asoshi nokdaktsü aser nüngdak dang süra, aibelena aliba lenirtemi appointment agiena Nagaland state tesem ajunga nung temsüa aliba aser jangra aliba nübu meyirijang aika nem ochi obendang agütsütsü asoshi nokdaktsü renema aser mulunga lir, ta AKTD sangdong ajangasa metetdaktsü.