Mkg DC ajanga COVID-19 atema totuyuba agütsür

Dimapur, Metsüremi/March 20 (TYO): Nagaland nung Nagaland Epidemic Disease (COVID-19) Regulations 2020 benokba aser Novel Corona Virus (COVID-19) prokshiba ajemdaktsütsü mechi Mokokchung District kübok yimtsü aser ward ketdangsertem nem Deputy Commissioner, Mokokchung, Limawabang Jamir ajanga teinyatsü mapa kar agütsüogo.
DC Mokokchung sangdong ajanga ashiba agi, Village Task Force for Novel Corona Virus (COVID-19) aser Ward Task Force for Novel Corona Virus (COVID-19) tentettsüla aser District Task Force for Novel Corona Virus (COVlD- 19) Mokokchung den osangtsüsang agiteptsüla.
Yimtsüng aser ward nung task force ajanga tanga state nungi aruba nübur aser kaketshirtem jangjateta ar-asangtsüla.
DC-isa tanga state nungi aruba nübur aser kaketshirtem dang anasatiba health centre nem osang agüja aser Helpline Number: 9436006387 / 8837420932 ajanga tongteprateptsü metetdaktsü aser tanga state nungi aruba nübur aser kaketshirtem tangaleni moi kidang temang anepalua alitsü ajungshi.
Maneni lokti nungi pilaa aliba yimya sübatsü aser pei sasa mürekmejua alitsü asoshia kasa sangdong ajanga metetdaktsü.