Metsübo aser Tongpang nati Covid-19 dak sentakba nung dist. admin aser lokti balala lenirtem den mensem aka

Minister Metsübo Jamir aser minister Tongpang Ozüküm nati Mokokchung semdanga district administration, Covid-19 district task force züngsem aser lokti balala lenirtem den telungjem mensem akadang tangokba noksa nung angur. Mokokchung, March 20, 2020.

Mokokchung, March 20 (TYO): Nagaland rural development minister, Wb.Metsübo Jamir, Housing & Mechanical minister, Wb. Tongpang Ozüküm nati March 20 nü Mokokchung semdanga district administration, Covid – 19 District Task Force züngsemtem, mulungtet telok aser arogo lenirtem den Convid-19 tebilemtsü dak sentakba nung telungjem mensem ka kaogo.
Metsübo Jamiri iba senden nung jembidang, state sorkaria akokba tashi Covid -19 (corona Virus) dak sentakba nung mera tapu balala agidaki, ta metetdaktsü. Tia junga tang tashibo Nagaland nung iba tashitak putetba osang mali, aji saka, asenok ajak kümkümshia alitsüla aser sorkari koba tetuyuba agütsüdir, ajaki amaliteptsüla, ta paisa ashi.
Arogotemi iba dak sentakba nung mera balala agiba ngua kanga pelaba den tang ya sarasadem kanga nungdakba mapang ka lir, anungji, alima ajunga nung iba tashitak züina maotsü atema maneni sarasademdaktsünür, ta paisa mepishia ashi.
Covid-19 agi shiranger amai temulung melemteti bilemba osangtem yaktasa bangdakpur nem osang yoktsü asoshi yimtsüng shia dangi osang yokogo, ta pai ashi. Naga nunger asoshi kibok kisemba ya yimya ka lir, aji saka, tang ya koda masüba mapang ka ajurushir asünung, tensa tia süngjema maküm tashi iba nungjagi akok tashi pilaa alitsü merangtsüla, ta paisa inyakdaktsünüba o ka shisem.
Joko asenok dangi yakta Aor benjung Moatsü arutsüba lir, akok tashi benjung tulu mayongzüktsü asoshi paisa mepishia metetdaktsü. Tang mapang ya lokti senteptsübaji majungshir, anungji, lokti sentepba sentong kecha mayongzüktsüla, ta paisa shisem.
Dimapur, Mokokchung, Mon aser Wokha district-tem ya tangar dang nungi balaka kümdangshitsüsa adoker, kechiaser item district ajanga tanga state balalai aor, anungji, check gate ajak nung gari aser süisüpongertem kanga junga mittsüla, ta paisa ashi.
Tongpang Ozükümi jembidang, tang tashi nung district administration-i anir telok shirnokisa iba dak sentakba nung maparen balala inyakdaki, ajak dang pelaba lemsatep. Tang mapang ya kümdanga alitsübaji kanga tongtibang, kodang kechi ataloktsür ashi makok, anungji, asenok saksalema aser renema atatsüla, ta paisa ashi.
Iba ya zübazüba magitsüla, yimdak yimtsüng tashi nung iba dak sentakba indang osang perokshia ayim süngdaktsütsüla, ta pai ashi. “Tang ya asenok asoshi kümdanga alibajisa lenmang tajungtiba asütsü”, ta paisa shisem.
Mokokchung district atema temperature tendangba ‘thermal scanner’ ana (2) arua lir, ta Mokokchung district administration-i metetdaktsü. Thermal tetendangbaji March 21 nungi mapa küma tenzüktsü aser nisung kar dak danga temperature tali tapong aliba putetra, anasaba health centre bushia yoktsü, ta parnokisa ashi. Covid-19 dak sentakba maparen balala inyakdang nüburtem ajaki tashi angaa amaliteptsü asoshi parnokisa mepishia metetdaktsü.
Senden nung medical doctor kar ajanga Covid-19 dak sentakba nung power point presentation bener arua shisa balala lemsatep. Iba senden nung Nagaland Hotels Limited chairman, Wb. Tinu Longkumer densema liasü.