Küm 7 sülen Nirbhaya tepsetertem alensetogo

New Delhi, March 20 (Agencies): Küm tenet tejakdang Delhi nung tebur telok kati tetsür kaketshir ka dak tashiyim agi shi nung medemba aser reshikangshir tepsetba sülen, la dak tashiyim mapa inyaker nisung pezü tanep 5:30 ako nung alensetogo.
December 16, 2012 aonung iba tashiyim aser taochi maliba mapa inyakba ajanga linük dang masü saka alima anokshidakja liasü aser iba tetsürla dang ‘Nirbhaya’ (tatsütait) ta tenüng jaloktsü.
Supreme Court-i aibelener indang final petition ka magizükba sülen ghonda ana majungdang par pezü alenset.
Iba ken o nung aitsür atema okatsüri yasüng Delhi High Court nung temepishiba ka benoka liasü aser iba nung coronavirus ajanga kulikaket shitak magütsüteter ta pai ashi.
Tanep Akshay Thakur (31), Pawan Gupta (25), Vinay Sharma (26), aser Mukesh Singh (32) nungertem Delhi nung aliba Tihar Jail nung süngzü agi alenset, Par pezü yasüng mejanga mao aser tanep tatemsa atema chiyungtsü agütsüba meshia machi.
Tanep 3:30 ako meta parnok tepuokdak taktang nungi anizük aser 5:30 ako meta alenset.
Yasüng Akshay Thakur atema okatsüri “parnok India-Pakistan arrtsüi yokang, Doklam-i (China den arrtsü) yokang, saka parnok malensettsüla” ta okadak mepia liasü.
“Onoki mapang talangka iba anogo atema ataogo. Tanü ya India nung jalatem atema anogo tasen ka tenzüker. Shiruru tamajungtem alensetogo” ta Nirbhaya tetsü Asha Devi-i ashi.