NPF-i CAA aser COVID-19 indang kakettem sayaogo

Dimapur, March 20 (TYO): Naga People’s Front (NPF)-i Citizenship Amendment Act (CAA) atema lungkak aitba aser Corona Virus (COVID-19) indang kakettem sayaogo.
Kaket tila ana ya NPF Tir, Dr. Shürhozelie Liezietsu-i tanü Central Office, Kohima nung sayatsü.
“CAA aser Covid-19 tebilemtsü ana ya Naga nunger atema tongtipang lir. Iba virus ajanga alima aoksadaktsür aser iba ya noktangtsü atema mapa inyaker. Anungji, regional party ka ama, NPF-i teküpoktiba jenjang tashi lua coronavirus indang osang prokshtsü” ta Dr. Shürhozelie-i ashi.
Asenok kanga junga renema atatsüla aser coronavirus noktangtsü atema kümdanga alitsüla, ta paisa ashi.
CAA indang onük jembidang “iba Act ya asenok atema kasa lendong keta lir kechiyong iba ajanga Naga nunger tarutsü nung kongshir” ta NPF Tirisa ashi.
Anungji, item kaket tila ana ya mapang shitak nung adoker aser asen temang den asen tarutsü atema tongtipang lir, ta paisa shisem.
Covid-19 indang kaket nungji onük 11 dena lir aser local oshitem nung meyipzüker ajaklen prokshitsü.
Iba sentong nung mendenji Secretary General, Achumbemo Kikon liasü aser Senior Pastor Rev. Vevo Phesao-i temoatsü meshia sarasadem. Sentong nungsa working President ana- Apong Pongener aser Thenucho na den Nagaland aser Manipur nungi party züngsemtem aden.