Mopungchuket putu menden ajanga sangdonger

Dimapur, Metsüremi/March 22 (TYO): Tanü putu mapang Coronavirus (COVID-19) wara tesashi ajanga alima ayimsünga prokshiba osang angazüka Nagaland state sorkar aser Mokokchung District Administration ajanga nüburtem dang tekümdangtsü metetdakja sangdongba dak sendakba nung ajemdaker Mopungchuket Village Council ajanga bendang balala nung alir nübur aser sensosangertem ajak dang temetettsü osang kar sangdongogo.
Sangdong ajanga ashiba agi, Mopungchuket süngkümshi telongtet nung Süngkotenem Awatsüng aser Park, Mangkolong, Longrangtenem, Jina aser Etiben Mitsa aser ‘Tourist Spot’ ajak shibanger. Mopungchuket süngkümshi telongtet telungi ‘Foreign aser Domestic Tourist’ shinga aittsü memelatsü.
Mopungchuket putu menden ajangasa ashiba agi, Mopungchuket süngkümshi adena kishi kina aser kidanger yimtsüngtem gari nung oliora senzüsempongba menokdanger saka shinga süngkümshi telung aser yim tamaket nung anenzüka kazütsü mesüra meshimerüktsü memelatsü. Bendang balala nung sensosangertem Mopungchuket telungi aittsüsa kümra jilia Mopungchuket Village Council den tongteprateptsüla aser Sub-Centre nung Thermal Scanner ajanga temang repranga tendangtsüla.
Senso lanurtem bendang balala nung shirnok tezüngdak lir, talisa Nagaland adena orr alirtem shirnok lir, yimkongi meyipa arutsüsa kümra yimtsüng süngkümshii maitdang tama tongteprateptsüla aser Village Council nem metetdaktsütsüla. Iba dak sendakba nung Tsüraburtemi pei tanurtem dang osang metetdakja jilajidongtsüla, ta Mopungchuket Village Council chairman, Lipoktemsu Jamir ajanga kasa sangdong nung metetdaktsü.
Maneni, Mopungchuket yim telongtet nung anempong sangdonger aliba mapang pur bendang shirnoki iba anempong raksaja koda masüba atalokra ibajibo tatem tashi bushitsü aser tatok malitsü ta jilia sangdonger, ta parnokisa metetdaktsüogo.