MCCI-i nüburtem dang tekümdangtsü metetdaktsür

Dimapur, Metsüremi/March 22 (TYO): COVID-19 tashidak wara nungi jenbua alitsü asoshi state sorkari totuyuba agüja aliba sülen anidaktsü asoshi Mokokchung nung shishilembar ajunga nem metetdaktsür, ta Mokokchung Chamber of Commerce and Industry (MCCI) sangdong ka ajanga metetdaktsü.
Sorkari tuyuba ama, pharmacy, fuel refill station aser chiyongtsü, aonsotsü, bakery aser confectionary, anogoshi amshiba osettsüset ayokba tesemtem aser nüngdakba oset ayokba tesem dak alaka tanüngba dokan aser business establishment ajunga tarutsü nung osang balaka mesangdong tashi shibangtsü totuyuba agütsüogo.
Maneni MCCI-isa shishilembartem khen asoshi state alema moi atatsü totuyuba agütsüogo. Shishilembartemi senotsü amshiba mapang kanga kümdangtsü ajungshir, kechiaser iba virus ya parnoki tali tekeraba belenshitsü südi, ta temulung melemi lir.
Maneni nüburtem dang tetsübu nung osettsüset malitsü ajungshir, ta MCCI ajanga ashi. Market nung nüngdakba osettsüset peria lir aser nüngdakba oset abenba garitem teti ama shidak jajar, ta parnoki ashi.
MCCI ketdangsertemi shishilembaba tesem mita alitsü aser shishilembar kar danga tensa majungba nung ajemdaker tajangzük bushia tim masüba yimyatem amshiba butetra tapet temerenshi agütsütsü, ta sangdong ajangasa ashi. Osangtsüang tali tejangjaba metettsü asoshi nüburtemi MCCI ketdangsertem den mobile number 9436006062, 9436016099, 9436605461 mesüra 9436006431 ajanga tongtepratem süang, ta MCCI ajangasa metetdaktsü.