Dimapur nung ita 3 dak tali peritsüsa yua lir: DCCI

Dimapur, March 22 (TYO): Nagaland state sorkari Covid-19 wara atema mapang shitak nung telemtetba tajung agia mapa inyakba atema tenüngsang agütsür, ta Dimapur Chamber of Commerce and Industry (DCCI)-i tanü sangdong ka nung ashi.
“Alimai iba wara anema raradang, kija aser lokti tebilemtsü bena ajak lendong nungi jenbutsü atema mapa yariteptsüla. DCCI-i akokba tashi Covid-19 anema state sorkar aser administration den yariteptsü,” ta Tir Akashe Zhimomi-i sangdong nung shia lir.
Parnokisa sensotem dang olulu aser kuli tejangja maliba osang nung mamangtsü mepishir, ta paisa ashi.
“Dimapur nung ita asem den teimba peritsüsa nüngdakba ajak rizünga lir. Anungji public-i nüngdak maliba nung kechisarena alidena mayutsüla aser shishilembadak lokti madenshitsüla” ta DCCI-i metetdaktsü.
Sorkari tetuyuba agütsüba ama DCCI-i non-essential items ayokdak- Shopping malls, Cinema halls, Marketing complexes ajak shibangtsü.
DCCI-isa Medicine, Groceries, Vegetables and fruits, Confectionaries, Petrol pumps aser Dine-in Kitchens (for take away only) dang lapokdaktsütsü.
Ajisüaka, lapoktsü melaba dokan kiburtemi administration-i latettsüba ama inyaktsüla aser iba nung Hand Sanitizers, Tzü aser Sapon ayutsü aser customer/s den jembidang mask enoktsüba dena lir, ta DCCI-isa metetdaktsü.
Tashi mangai dokan lapokertem ozüng tapet agi merenshitsü aser kibong nungi nisung kati dang shishilembatsü atema mepishir, ta parnokisa ashi.