Corona virus noktangtsü atema Nagaland ajunga shibanger

March 22, 2020 nü Kohima nung Chief Secretary Temjen Toy den Principal Secretary Abhijit Sinha (achiji) aser ADG R P Kikon (abelen) nungertemi osangbener den jembidang agiba noksa angur.

Kohima, March 22 (TYO): Nübortem kümzüka ayutsü aser novel Corona Virus (COVID-19) prokshiba noktangtsü atema Nagaland sorkari March 22, 2020 ayaterm nungi state ajunga shibangtsü telemtetba agiogo.
Deobarnü Nagaland Chief Secretary Temjen Toy-i osangbener den jembidang “Nagaland nung COVID-19 aketer ka dang puteta mali saka lendong nungi jenbua alitsü atema Honibar ayaterm nungi state ajunga shibangtsü tetuyuba agütsür” ta ashi.
Temjen Toy-isa ashiba agiba, “Nagaland nung dokan aser shishilembadak ajak shibanger saka iba tenokdangba kübok pharmacy, petrol pump, grocery dokan (jangotsü, chiyungtsü, aonsotsü, anogoshia nüngdakbtem ayokba dokan, tanga nüngdaktem ayokba dokan) aser media office tem madener.”
Nagaland nung bus, taxi, auto mesüra two wheeler taxi amala commercial passenger vehicles (public & private) mesenzütsü. Ano. state balala tsüngda senzüba garitem March 23, 2020 ayaterm tashi dang senzüdaktsütsü, ta paisa ashi.
“Iba tenokdangba mapang public-i nüngdak atema dang senzütsüla. Sorkari tesenzü ta ozüng magütsür saka tanü Janata Curfew nung shilem agiba ama nübortemi iba tetuyuba sülen anidaktsü imlar, kechiyong iba ya asenok anema alitsü atema dang lir” ta Nagaland Chief Secretary-isa ashi.
Chiyungtsü, nüngdakba osettsüsettem, medical equipments & supplies aser goods vehicles, security forces dak alia, Inter-state entry points ajak shibangtsü. Ajisüaka, entry point nung inyakyim lateta aliba ama drivers aser attendants medical screening asütsü, ta paisa ashi.
District Administration, Police, Security Forces, Fire and Emergency Services, Home Department, Medical, Postal Services. National Information Centres, NSDMA, Power, PHED, Food and Civil Supplies, Finance, Treasury & Accounts, Banks & ATMs, AIR, Doordarshan dak alaka Central aser State sorkar office ajak shibangtsü, ta Chief Secretary-isa metetdaktsü.
Ajisüaka, Administrative Heads of Department, Heads of Departments aser Heads of Offices-i pei pei ketdangser aser staff nungi core group ka tentettsü aser rongdak nüngdak adokdang iba telok yagi mapa inyaktsü. Nüngdak adokba mapang tanüngba sorkar mapa inyaker ajaki yariteptsüla, ta paisa ashi.
“Sorkari tetuyuba agütsüba sülen manidakba kija mesüra teloktem Indian Penal Code nung Arrla 188 kübok temerenshi alitsü” ta Temjen Toy-isa ashi.
COVID-19 wara adokba sülen tangalen alirtem March 6, 2020 sülen Nagaland-i meyipa arurtemi health department nem osang sangoktsütsüla aser pei sasa ‘home isolation’ nung alitsü mepishir, ta paisa metetdaktsü.
Nagaland nunger dang “Chinese” ta jaa bendanga amshiba tebilemtsü ya Nagaland sorkari Centre dangi benogo aser iba ya nokdangtsü atema mapa tenzükogo, ta Chief Secretary-isa ashi.
“Tanü tashi Nagaland nung coronavirus aketer ka dang puteta mali aser tendangtsü atema sample ka dang meyok, saka nübortem kidang lidaktsütsü mechi nung iba tenokdangba agütsür” ta paisa nenshia metetdaktsü.
“Nisungtem kilung nung aliba, lokti nungi pilaa aliba aser temang merüka ayuba ajanga dang corona virus nungi kümzüka liteter” ta paisa ashi.
Nagaland nung corona virus indang testing laboratory maliba atema Temjen-isa ashiba agi “Deobarnep Union Cabinet Secretary den video conference alidang Nagaland nunga testing facility ka nüngdaker ta Ministry of Health dang shiogo.”
Tendangtsüsa tensa ka ajurura Assam kübok Dibrugarh aser Guwahati aser Manipur kübok Imphal-i bener yoktsü, ta paisa shisem.
“Nagaland nung corona virus atema renema lir aser iba atema train services ajak anendaktsüogo aser airlines atema telemtetba ano magi lir. Iba tashidak agi shirangertem anepalutsü atema yipten 180 tashi renema lir. Sorkar mozü kitem nung mock drills liogo aser iba mapang metokmeperibatem ajiteta anepaluogo. Nagaland state nung medical nisungtemi iba tensa azüoktettsü imlar,” ta Chief Secretary-isa metetdaktsü.
COVID-19 ya alima ajunga nung prokshir aser kanga dang tejaklen orr aliba linüktemia iba tashidak mazüokteter. Nagaland sorkaria technology tasentiba ajungkettsü aser ventilator machines, personal protective equipment, hand sanitizers & mask bener arutsü meranger, ta paisa ashi.
Kohima Science College Jotsoma aser Fazl Ali College Mokokchung-i hand sanitizers peria manguba khuret angateta yanglur angadi alemba atema tenüngsang agütsür, ta Temjen Toy-isa shisem.
Indo-Myanmar international arrtsü nung Nagaland tsütsü shibangogo aser district administration, village councils aser village guards dang arrtsü junga anüktsü tetuyuba agütsüogo, ta paisa ashi.
“Nagaland-i nüngdakba ajak peria bener arutsü aser iba atema tenokdangba kecha magütsür. Anungji, nisungtemi taoksa nung petsaprongtepa lijaliyong masütsüla, kechiyong ajak peria dang angutsü” ta Temjen Toy-i jangjangja ashi.
Iba osangbener senden nung Additional DGP R P Kikon aden aser pai ashiba agi, “Nagaland nung COVID-19 aketer puteta lir ta taila osang prokshiba atema nisung 30 jaoka asüngdangya asüba nungi police-i tetsür ana apu, saka tena dang iba mapa meinyaktsü shir bail bond nung chiokogo.”
Senden nungsa Principal Secretary (Home) Abhijit Sinha aden.