COVID-19 dak sendakba nung TDTF training agi

Dimapur, Metsüremi/March 23 (TYO): March 23 nü DC’s conference hall nung COVID -19 dak sendakba nung Tuensang District Task Force training ka agiogo. Deputy Commissioner Kumar Ramnikant lenisüba kübok iba training agi aser training nung District Administration, DIG, Police, AR, Medical, TDDMA, NGOs aser kin balala nungi lenirtem dena liasü.
COVID-19 atema Tuensang Nodal Officer Dr. John-i tashidak menatepa aoba yimya, tashidak symptoms, COVID-19 epidemiology tatongi rasaa ashi aser iba sülen COVID dak sendakba nung sensak sema liasü.
Tuensang Nodal officer-isa, quarantine inyakyim koma benoka inyaktsü, iba indang rasaa ashi. NGO nungi züngsemtemi COVID-19 dak sendakba nung parnok sasep nung inyakyimtem indang osang agütsü.
Kasa mapang nung District administration-i, kiyong nung lenirtem dang kaketshirtem asayaba moapu balala nung asayaba azüoktsü tuyuba den parnok nem COVID-19 tashidak pokteter aliba ajanga kechiba jila ajunga shibanga ayutsüsa aküm iba indang metetdakrtsütsü ashi. District administration-isa, Tuensang nung all ward union dang tangalen nungi aruba kaketshirtem meit atatsü asoshi core team tenteta TDTF nem osang agütsütsü teyu, ajita asünungdang inyakyimtem shidak benoka inyaktettsü.