Dimapur nung curfew alitsü ozüng agütsür; Nisung 5 tema mesenzütsü; Teshimtet dokantem lapoktsü

Dimapur, March 23 (TYO): March 24, 2020 anepdang 6:00 ako nungi Dimapur nung Sec 144, CrPC ozüng alitsü ta Commissioner Police Dimapur, Rothihu Tetseo-i tanü metetdaktsü.
Iba ya public temang anema alitsüba, kümzüktsüba aser tensa tiptemtsü atema ozüng agütsür, ta Tetseo-i ashi.
Iba tenokdangba mapang nisung 5 dak tema adenshitsü memelar. Ajisüaka, jelia renemba sentongtem atema CP indang office nungi temelaba balaka meshitsüla, ta paisa shisem.
Iba mapang nüngdak mali ser nung senzüba garitem noktanger. Ajisüaka, iba tenokdangba kübok Police/ Army/ Para Military Forces/ Magistrate on duty/ Doctors & Medical Staffs, Media, aser emergency services inyakba nisungtem den tang nüngdakba ayokba dokantem madener.
Centre-i COVID- 19 ya wara tesashi ka ta sangdongba aser state sorkaria Epidemic Diseases Act, 1897 benokba nung ajemdaker Dimapur nung tenokdangba agütsür, ta Dimapur CP-isa metetdaktsü.
Dimapur nung alirtem dang petsaprong masütsü kechiyong 144 CrPc ya law & order khuret atema masü saka public health & safety atema agütsür, ta paisa ashi.