ADC Noklak-i COVID-19 nungi jenbua alitsü asoshi tuyur

Dimapur, Metsüremi/March 24 (TYO): Additional Deputy Commission, Noklak, M. Chaitanya Prasad IAS-i sangdong ka ajanga, novel coronavirus tashidak wara alima ajunga sünga prokshiba mechi Noklak Sub-Division kübok aliba village council ajak dang tekümdangtsü mera balala kanga junga agitsü metetdaktsü.
Sangdong ajanga ashiba agi, yimdak putu menden ajanga pei yimtsüng telungzük nung nüburtem senzüsembongba aser talisa dangalen nungi arurutem mita reprangtsüla.
Yimtsüng telungzük nung nüburtem adenshiba nokdangtsüla aser tia makai COVID-19 tashidak wara agi menepra, iba mapang amshitsü asoshi council hall mesüra yimtsüng nung rest house mesüra iba amala tesemtem ya “quarantine zone” asütsü mükaa ayutsüla aser kasa inyakyim aser mera balala agiba osang tekeratiba nung ADC Noklak office nem metetdaktsütsüla, ta ADC, Noklak ajangasa metetdaktsü.
Ajungben iba amala tensa kar ajurura yimdak putu menden ajanga ASHA, ANM, CHO amala health worker den tongtepratep asütsüla aser COVID-19 dak sendakba nung sorkar (state aser district administration) ajanga mapang shia totuyuba, sangdong, tazüokbatem agütsüba sülen village council anidaktsüla, ta sangdong ajangasa metetdaktsü.