Oset tali bendena ayurtem merenshitsü: DCCI

Dimapur, Metsüremi/March 24 (TYO): Dimapur Chamber of Commerce and Industry (DCCI) ajanga sangdong ka nung dokan aser shishilembaba tesem kibur dang osettsüset tali bendena mayutsü metetdaktsüogo. Iba ama ozüng alema osettsüset talitabong rizünga ayuba dokan aser tesem kar danga putetra item tesemtem shibangtsütsü aser osettsüset ya angadi lema agütsütsü atema administration nem agütsütsü, ta DCCI sangdong ajanga ashi.
Sangdong ajanga ashiba agi, DCCI ajanga shishilembaba tesemtem teti meita atatsü aser nüburtem nungi ashishitepba agizüktsü. Maneni DCCI-isa nüburtem dang, chiyongtsü aser nüngdakba osettsüset peria rizünga lir aser item nüngdakba oset abenba train aser truck tem shidak jajar, anungji shisabulu masütsüla, ta nenshia shiogo.
Iba dak sendakba nung DCCI-i administration aser police dang nüngdakba osettsüset abenba garitem sadena jajadaktsütsü ajungshi.
COVID-19 tashidak anema raraba mapang shishilembartemi tangatetba nung senotsü aser nüngdakba osettsüset agi administration aser sorkar yaritsü ajungshir, ta sangdong ajangasa ashi.
DCCI ajanga Dimapur Municipal Council (DMC) nem sprayer tejang 20 dak tali agütsüogo. DMC ajanga yimti telung aser temeket nung mozü akha tenzüktsü, anungji iba maparen nung nüburtemi amalitep akatsü mepishir, ta DCCI-isa ashi.
Coronavirus tashidak den raratsüba ya sorkar aser administration kisüng tebilemtsü masü, anungji lokti tentet aser kija-ia iba tashidak madak takok angutsü asoshi nokdakba nung yaritsüla, ta parnokisa ajungshi.
Timtem aser mepetmesü kar danga ajurura nüburtemi mobile number 9436002945, 9402022222, 7005526728 aser 7005031706 nung WhatsApp ajanga tongteprateptsü mepishir, ta DCCI tir, Akashe Zhimomi-i sangdong nung metetdaktsü.