Bajrang-i ita trok sen tenla agütsü

Metsüremi/March 24, 2020 (Agencies): Coronavirus tashidak pokteter aliba anema raratsü asoshi Deobarnü Bajrang Punia-i ita trok indang pa itasen Haryana nem tenla agütsüogo.
“Ni ita trok atema kü itasen Haryana Chief Minister ML Khattar-i COVID-19 agi shirangertem atema relief fund amenokba nem agütsüogo,” ta Punia-i tweet asü, shiba Railways nung special duty office ka ama inyaker.
Maneni 2019 World Championship bronze medalist-i iba relief fund nem tenla agütsütsü ayongzükogo. Iba mapa tajung asoshi Sports Minister Kiren Rijiju-i pa nem tenüngsang agütsüogo.
Indian Express den iba tashidak aser taruba Tokyo Olympics indang jembiba mapang Punia-i ashiba agi, “tangbo asenok iba tashidak nung kümzüka alitsü asoshi kümdanga alitsüla. Ajisüaka training anena atatsü ta masü. Ni anogoshia training agidaki saka iba den külemi temang anepalua alitsü kanga tongtibang.”
“Tang tensa apir Olympics thinena ataba tajungba asütsü. Iba ya onok asoshi dang masü saka alima ajunga nung asayartem atema tajangzük asütsü. Ajak asoshi timtem mapang ka lir,” ta pai ashi.
Hombarnü Haryana government-i Covid – Sangharsh Senani’ ta nüngja agütsür voluntary programme ka tenzükogo. Iba programme yagi nüburtem nem teyari agütsütsü.
Kasa mapang nung BJP MP Gautam Gambhir-ia, iba tashidak den raratsü asoshi MPLADS fund nungi Delhi government hospital tem nem sen lakh 50 agütsüogo.
Maneni Irfan aser Yusuf Pathan natia Baroda nung local administration ka nem mask 4,000 shi tenla agütsüogo.