Minister Pangyu-i Dimapur nung mozü kitem sema senzü

Dimapur, March 24 (TYO): Health & Family Welfare Minister, Pangyu Phom den IPR, SCERT & VG Advisor, Toshi Wungtung nati tanü Rangapahar, Eden Hospital, CIHSR (Referral Hospital) aser Dimapur Airport sema senzü.
Dimapur nung COVID-19 atema inyakba maparen reprangtsü aser osang metetpelatsü atema tenati item tesemtem semdanga liasü.
Rangapahar Military hospital nung COVID-19 shirangertem atema isolation yipden 9 aser ICU nung yipden 8 den ventilator 1 aser transport ventilators 2 aliba atema pelar, ta Minister Pangyu-i ashi.
Iba mapang AVSM, SM, VSM, GOC Spear Corps, Lt.Gen. RP Kalita-i rongdak nüngdak adokdang inyaktsü atema nisung 100 melentepa inyaktsü renema lir ta ashi.
Tang ya nisungtem pilaa alitsü mapang ka lir aser ibaji angateta sodi agir aliba sepaitem nem ano sodi talila agütsüogo aser kar koda masüba agi meyipa arurtem quarantine süa lir, ta RP Kalita-isa ashi.
“Myanmar aser Longwa dena arrtsü ajak shibangogo aser Nagaland nung dang masü saka Manipur aser Mizoram nung sepaitem mapa lemzükja lir,” ta paisa ashi.
Eden Hospital nung Minister Pangyu-i Nagaland Private Doctors Association (NPDA) den senden ka amen.
Idangji pai nija doctor tem dang iba ama mapang nung tebilemtsü bena yariteptsü ayongzük.
NPDA-i COVID-19 atema tebilemba lemsatepatemji Chief Minister aser cabinet züngsemtem dangi abentsü aser state ajunga ajangzüktsü atema onok külemi reprangteptsü, ta Pangyu-isa ashi.
“Nenok medeni sorkar sector kija agi kecha mesütettsü anungji asenok ajak longjemer inyakdi” ta Minister-isa nija doctor tem ayongzük.
Idangji NPDA tiria sorkar den külemi yariteptsü ta nangzük.
Dimapur Airport nung Airport Director, Zhimomi-i Minister aser par telok dang COVID-19 dak sendakba maparen inyakba osang lemsatep.
CIHSR (Referral Hospital) nung Medical Superintendent, Dr. Clement-i osang lemsatepdang, yipden 10 renema lir aser staff 120 shi training agütsüogo ta ashi.
“COVID-19 atema Rapid Response Team balaka tenteta lir ajisüaka ventilators peria amliba atema tebilemtsü abener. Aoksa COVID-19 wara adokra ventilator 2 mesüra 3 dang amshitettsü” ta Dr. Clement-i ashi.
CISHR nung dialysis agirtem aser cancer agi shiranger aika anepalur, anungji shiranger aika manioktettsü. Maneni, health workers atema protective gowns aser N 95 masks peria mali aser tang gowns 25 dang lir, ta paisa Minister Pangyu dang ashi.
“CIHSR ya mozü ki tajungtem rongnung ka lir anungji ketdangsertemi kanga junga renema alitsüla aser Department den amalitepa yariteptsüla. Sorkaria akokba tashi yaritsü” ta Pangyu-i ashi.
“Tang tensa ajurua aliba ya medical khuret ka dang masü saka ajak indang khuret ka lir. nübortemi petsaprong masütsüla aser iba tashidak anema inyakertemi akokba tashi merangtsüla” ta Advisor Toshi Wungtung-ia ashi.
CMO Dimapur Pangjung Sangtam, Dy. CMO. Dr. Antony, MS Dimapur, DPRO Dimapur aser district administration ketdangsertemi tanü Minister Pangyu meiner senzü.