COVID 19 tendangba laboratory amenoktsüla: DALT

Dimapur, March 27 (TYO): Dimapur Ao Lanur Telongjem (DALT)-i Nagaland nung testing laboratory ka danga maliba atema tebilemtsü abenba lemsatepba den külemi state sorkar dang COVID 19 tendangtsü atema laboratory ka amenoktsü takhangba agütsüogo.
“Nagaland state sorkar aser medical wadang nung inyakertemi COVID 19 wara azüoktsü atema mapa inyakba atema kanga pelar, saka kasa mapang nung Nagaland state kümteter küm 60 jungnüa aruaka, asen state nung testing laboratory ka danga maliba atema aoksar aser tebilemtsü abener” ta DALT-i Nagaland Chief Minister dangi züluba shidi nung shia lir.
Iba shidi ya March 25, 3020 nü DALT-i Dimapur Deputy Commissioner ajanga Nagaland Chief Minister nem agüja liasü.
“Nagaland sensotem kümzüka ayutsü atema state sorkari mapa balala inyakba atema pelar saka COVID-19 anema inyakertem nem nüngdakba ajak peria magütsütetba aser testing laboratory maliba ajanga tangaleniang sample tendangtsü bener yokba atema nemjemer aser kanga sasa bilemer” ta DALT Tir Aotemsü Aier aser Tongti Tezülur S. Pangertoshi nati shidi nung shia lir.
“State nung alirtemi aginüba ama inyakba aser sensotem kümzüka ayuba sorkar ka ama COVID 19 atema testing laboratory ka tangsa amenoktsü mepishir” ta DALT-isa Chief Minister dang ashi.