Nagaland nung nisung 2719 quarantine nung lir

Kohima, March 27 (TYO): India nung corona virus anema linük ajunga shibanger anogo asembuba arudang Nagaland nung nisung 2719-i pei sasa osang agüja quarantine nung lir.
Planning & Coordination Minister aser Nagaland nung COVID-19 atema otongdar, Neiba Kronu-i ashiba agi “tanü nikongtsütsü 5:00 ako tashi nung nisung 2719-i pei pei District Surveillance Team nem osang sangoktsür home quarantine nung lir. Parnok rongnung kaketshirtem dena lir.”
Nisung pezü facility quarantine nung lir aser sample 17 tendangtsü bener yokba nungi 13 negative ta putetogo aser pezü indang result ano mangu lir, ta Neiba-isa ashi.
Health and Family Welfare, Pangnyu Phom-i Chief Medical Officers aser Medical Superintendents ajak den Video Conferencing ajanga Nagaland nung COVID-19 wara indang osang metetpelaogo, ta paisa shisem.
“India sorkari teyari agia nüngdakba medical osettem bener arutsü merangtepdar. State ajungalen tongtipang nüngdakbatem peria dang ngudar aser kar mangutsüsa akümdang District Administration-i ibaji peria angutsü atema mapa inyaka arudar” ta Minister Neiba Kronu-isa metetaktsü.
“Linük ajunga shibanger anogo asem tashi arudang, state nung alirtemi tashi angaa yaritepa aruba atema pelar. Iba ajanga asenoki timtem aser tetsükdaktsütem ajurur asütsü akok saka iba ya asen state nung virus meprokshitsü atema inyakba mapa ka lir” ta paisa ashi.
Maneni, Village Council, Colony & Ward ketdangsertem, tamangba yimsü dak sendakba teloktem, shishilembar aser ajaki sorkar den yariteptsü mepishir, ta Neiba-isa ayongzük.
State adena orr aliba Naga nungertemi state sorkar dang teyari meshir aser iba atema khuret ajuruba state sorkar aser police den osang metetpelatepa yaria arudar, ta paisa ashi.
March 25 nungi 24×7 State Level Control Room ka lapoka lir aser iba nung timtem mesüra khuret ajuruba onüktem lemsateptsü akok. Ano, COVID-19 dak dak sendakba osnag lemsateptsü atema Health & Family Welfare Department-i control room ka lapoka lir, ta Minister-isa shisem.