Ao Kaketshir Mungdang -i metetdaktsür

Mokokchung, March 28 (TYO): Coronavirus (COVID-19) tashitak menatepa aoba noktangtsü koba state sorkar aser district administration ajanga kanga meranga aser nentaka inyakba asoshi Ao Kaketshir Mungdang (AKM)-i temulungchia repranger aser tenüngsang agütsür, ta AKM tir Sb. Nungdokyanger aser tongti zülur Sb. Nekmi Longkumeri sangdong ka ajanga metetdaktsü.
Nübur ajangzükdaktsütsü asoshi sorkari mera balala agia inyaktsüba ya jangratemtsü mapa tajung ka lir. Mapang ajak nung medical team-i state yimtiba nungi tenzüker meta talang yimdak yimtsüng tashi nung tensa meita inyakba ya senso ajaki tenüngsang agütsütsü tetemsü, aji oda, state nung aliba nüburtem asoshi nenoki inyakba mapaji kodanga mamatoktettsü, ta AKM lenirtemisa ashi.
Iba den district administration, Nagaland Police, Nagaland State Disaster Management Authority aser department ajak, NGO-tem aser lokti tentet balalai nübur asoshi yamai yakyaka aser bendanga tenzükba ya tenüng asangtsü tetemsü lir, ta parnokisa pelaba olen ka ashi.
“Sensosanger ajaki asen jakdang atalokba tensa angateta, sorkar tetuyubatem sülen amaliteptsüla. Iba tatalokba ya terenemshiba ka masü, saka meimchirtem tekübokba jenjangi ludakja asangsang nung atalokdar”, ta AKM-isa ashi.
Asen meketa item khurettem liaka, “asenok teka amtepa lungjemra aser sorkar aser bangdak ola anga-a anitakra asenok jenbutettsü. Nübur ajak tali kümküma alitsü aser kümdanga inyaksangshiteptsü mepishir, aji asünung dang yamala tebilemtsü tensa nung alidang nübur amalitep aser sorkari kümküma aser tapet mera agia inyakba ajanga COVID1-19 nungi pilaa litetba state ka kümtettsü”, ta parnokisa shisem.
Yamala tensa mapang ka nung liaka, AKM-i kaketshirtem dang kaket shisaliok tazüngba nung tali meranga azüngtsü aser sodiji ta sür züzüa malitsü ajungshir. Tarutsü anogotem nung shisaliok angazükba wadang nung takok süngjang chitettsüsa tang ya tali kümdangshitsü mapang lir, ta parnokisa kaketshirtem ayongzüka metetdaktsü.
State sorkar tetuyuba aser arrlatem nung amalitepa inyaktsü AKM temulungtetba aser koba nüngdaksa adokdir kishi sadema lapokja lir. Sorkar ketdangsürtem, talisa outpost nung alirtem ajaki pei nem nungloktsüba tesem metoktsüi alitsü ajungshir, ta kasa sangdong nungsa metetdaktsü.