COVID-19 dak sendakba nung district balala osang

Dimapur, Metsüremi/March 28 (TYO): Nagaland Government Principal Secretary Abhijit Sinha IAS-i sangdong ka ajanga, March 27 nü tashi nung district balala nung COVID-19 dak sendakba nung temzüng ozüng, tenüngdakba oset agütsüba aser services Manufacturing, Distribution aser E- commerce indang osang metetdaktsüogo.
Pai ashiba agi, tenüngdakba osettem asadanga alitsü atema district ajak nung control room amenokogo aser district ajak nung jangotsü aser chiyongtsü balala ayokba dokantem lapoka lir. Peren, Mon, Phek, Kiphire dak alaka tanga district tem nung mamatzü ayoktsü atema dokantem lapoka lir. Mozü ayokba dokantem district ajak nung lapoka lir aser tang tashi nungbo state nung jang, chiyongtsü balala aser mamatzü agi anüngba osang kecha mali.
District report ajanga ashiba agi, Nagaland nung nüburtem senzüsenpong masütsü asoshi tetuyuba agütsür aliba sülen nisung 100-i manidak. Kasa mapang nung U/S 106/107/CrPc kübok nisung asem sota lir aser nisung 27 puogo. Maneni gari ka puogo aser FIR ka benoka lir, ta kasa report nung shia lir. Tang tashi nungbo temzüng ozüng dak sendakba nung timtem adokba osang kecha sangdonga mali.
Essential services, manufacturing distribution & E-commerce dak sendakba nung COVID-19 tashidak pokteter aliba ajanga senzüsenpong mesüdaktsüi aliba agi kongshir aliba bendanger ayangertm nem chiyongtsü aser tejenokdak agütsütsü asoshi Dimapur District nung tapet jenjang agiogo. Dimapur nung Bengali Samaj aser Sikh lokti tenteti chiyongtsü temer lemdaki. Maneni Dimapur nung tenüngdak osettem belenshiba garitem nem senzüsenpongtsü asoshi temelaba agütsür lir, ta kasa sangdong ajanga metetdaktsü.
Züngoksema aliba ayangertem nem senotsü teyari agütsü
Dimapur, Metsüremi/March 28 (TYO): Labour Commissioner Er. S.L. WatiAier-i sangdong ka ajanga, Union Minister of State for Labour & Employment (independent charge) Santosh Kumar Gangwar-i, linük ajunga tashidak prokshia meyoktsü asoshi mokdanger aliba mapang timtem nungi jenboa alitsü ateam State/UT Welfare Boards nung züngoksema alir kisü jensürtem ajak nem senotsü teyari agütsütsü asoshi teyuba dak ajemdaker Nagaland Chief Minister Neiphiu Rio-i state nung züngoksema aliba beneficiaries tem indang account nung sen 2000 (meyirejang anana) inoktsütsü asoshi agizükogo.
Beneficiaries tem ajak senteper parnok 24457, Nagaland Building and Other Construction Workers Welfare Board nung züngoksema lir aser iba inyakyim ajanga parnok ajangzüktsü. Department of Labour Nagaland-i beneficiaries tem indang technical details ajak asadangogo aser Direct Benefit Transfer ajanga sen agütsü tenzükogo. Sen ajak agi ,89,14,000/- indoktsü imlar, koba Cess Fund nungi agizüktsü, ta kasa sangdong ajanga metetdaktsü.