Topic: Taneptsür Yisu Khrista

Text: Züngdangba 21:4-9, Yohan 3:14-15

1. OKILA:

Amangbapurtem ajak dangi asen kümzüsang Yisu Khrista temeim salem abener aser tanep asenok den Tsüngrem o nungi tatsüka lemsateptsü sarasadema tenzüker.

1. ONÜK TEMANG:

Israel nungertem Egypt lima nungi anizüker Kanaan lima bushia aoba mapang nung, parnok dak atalokba aika indang asenoki angashia lir.

Tsüngremi sayatenya nung parnok anir asünungji parnoki Tsüngrem tashi, Tsüngrem temeim aser Taochi parnok den lir ta asübaji jangja jangjaa ajangshia meteta liasü. Saka Tsüngremi moatsüba chiyungtsü tajungtiba jagia parnoki laktetadok, aser tesasatsü kaji parnoki par lenir aser Tsüngrem anema jembia temenen mena. Iba mapang parnok dangi timtem ka aruba indang Züngdangba 21:4-9 nungji asenoki züngogo.

Parnok anena aliba semtu nungji per pokteta per jagi mejia Israel nunger aika südaktsü. Idangji ya onoki Tsüngrem aser lenir anema inyakba ajanga ta parnok temenen rajema aru; aser Tsüngrem dangi parnok temulung meyipa, “Onoki temenen menaogo onok asoshi sarasademjang” ta shia Mosa dangi arua temenen nangzük.

Parnok asoshi iba tia ya  shibai metet tanü asenoki ajangshiba COVID 19 ya mesüka liasü südi ta bilemer. Taneptsü mozü maka, mozü shiteter teyarir mali, yaritsüba facilities-a kecha maka.

Idangji Tsüngremi Mosa dang ashi,

“Per tesashi ka yangluang aser aji rangtong nung tuloker parnok alidak tiyung nungji ajungketang, Aser shirnok daksa per agi mejidir iba per dakji reprangdakjang aser parnok aneptsü”

Mosai Tsüngremi ashiba ama inyak aser shirnokisa Tashi angaa Tamang agi per dakji reprang parnokji taneptsü angu.

Iba tatalokba nung ya asenok asoshi tangazüktsü lesson aika angur; saka tanep asoshi ni asenok den otsü asem indang yang nungi agiteta shiner.

*    Mezüngbuba nung Israel nungeri pei temenen realised süa nangzükba otsü tajung ka yangi lir.

*    Tanabuba nung Parnoki Tsüngrem aser Lenir dang tashi angaba otsü ka yangi angur.

*    Aser tasembuba nung Parnoki Tamang akaba otsü tajung ka idaki asenoki angur.

Item otsü asem indangji tongmelang agi tangatetba kar yamai lemsateper.

*    Parnok temenen yong kangshira ta Israel nungeri realised asü nung, parnoki pei temenen nangzüka Tsüngrem dangi anasai aru.

Israel nungertem per wara agi kangshiba ama, mozü makaba, koma yaritsü memetetba aser yaritsü facilities asen lima nung makaba tashitak Corona Virus tashitak agi asenok menepba arur. Asenok shisabulu agi sünga lir, tawadakdak maka, alima tashi kecha daka teimlatsü malia. Iba ama mapang ka nung Israel nungeribo Tsüngrem dang par temenen nangzük.

Tanü asen arogopurtemia asen menen nangzükra idakji teimla tulu ka lir. Naia koma bilemer? Arung asenoki asen menen, asen tsurapur menen aser asen lima temenen nangzükdi. Tsüngremi asenok dang angashitsü, aser asenok aneptsütsü.

*     Tanabuba nung teneptsü angutsü asoshi Israel nungeri Tashi anga.

Per agi meji aser ano per dakji reprangang ta ashi nung oda hai sür tashi anga-a reprang aser taneptsü angu. Parnok taneptsü angutsü asoshi parnok teinyaktsüa kar liasü. Parnoki tashi angaa per dakji reprangtsü nüngdaka liasü, aser parnoki aji inyakba yong parnok anep.

Tanü asenok asoshia alima lentong aser wara tulu nung yangi kümzüktsü asoshi asen teinyaktsüa kar lir.

Tashidak memenateptsü asoshi, Ainlen tesenzü, Kidang kazüang, Merukmejuang,  Lokti senden teka, Social distance yuang etc. etc. Asenoki tashi angatsü nüngdana aika lir ta bilemer

Tanü asenoki angashiba tashitak COVID 19 yabo tashi mangaba tashitak-a ta-a sa jembir. Nai tashi mangara na akoksatsü aser nai tashi mangaba agi alima nüburtem ajak asoshi takoksa tulu bener arutsütsü ana nung lir.

Tamanger tajung ka ama asen taküm, asen kibong, asen lima, asen arogo aser asen nüburtem kümzüktsü asoshi asenokbo tashi angadi.

Tasembuba nung Israel nungeri Tsüngrem dak Tamang katetba agi parnok taneptsü angu.

Per dakji masü, saka Tsüngrem shibai per dakji reprangang ta ashi, iba Tsüngrem dakji Tamang yur reprang nung parnok anep. Mozü aser Doctor teyarir makaaka, Tsüngrem dak taneptsü lir ta parnoki amangba yong per meim tashitak nungi parnok taneptsü angu.

Tanü asenoki angashiba COVID 19 tashitak asoshi ya mozü maka, ano asen lima nungbo yaritsüba facilities-a maka, anungji Doctor aser Nurse temia koma yaritettsü aji. Israel nunger tiaji mesük masü na ta bilemer. Süra, Ibala tia ka nung Ne Tsüngrem dakji naia koma amangteter? Teimla kecha makaba mapang ka nai Yisuibo ni aneptsütsü, Yisuibo ni kümzüktsü ta angatetbaji Tamangji lir.

Alima teyari kecha makaaka, teimlatsü kecha meliaka Yisuibo na kümzüktsü aser aneptsütsü ta nai tamang katetra na asoshi aji takokba otsü tulutibaji asütsü, aser iba jagi ne dak mapa inyaktsü.

III. ONÜK TEMBANG.

Temeim amangbapurtem, Alima nung tashitak tapu aika lir aser itemji ka sülen ka, ka sülen ka ta asenok dangi arutsü. Tashitak tesashi aika nungi asen Tsüngremi asen lima tongtanga aruogo, asen Tsüngrem asoshi tamakoktsü kecha malia, iba Tsüngrem nem asenoki asen taküm, asen kibong aser asen lima kümzükdaktsüner.  Saka iba Tsüngrem tashi jagi asenok dak mapa inyakdaktsütsü asoshi asen teinyaktsüa kar lir.

Israel nunger amaji,

*     Asenoka pei menen nangzükdi

*     Asen teinyaktsütem angateta asenoki yimten ozüng aser Tsüngrem dang tashi angadi.

*     Aser ajak dak alaka Asen Tsüngrem dak Tamang agi asenoki ranglokdi.

Ni amanger asenoki ya inyaktetra Tsüngremi asenok kümzüktsü. Tsüngremi Pa o ajanga asenok moajang. Amen.

                                                                                                REV. I. WATI

                                                                                                Pastor

                                                                                                Dimapur Ao Baptist Arogo