DNSU-i F&CS department dang mepelar

Dimapur, Metsüremi/March 29 (TYO): Coronavirus (COVID-19) tashidak wara tamajung prokshiba nungi nokdangtsü mechi public health emergency ka ama Central sorkari linük ajunga anogo 21 shibangtsü sangdonger alidang aser NGO aser lokti tentet balalai meranga inyaka makamaiter aser talisa talidak ki malirtemi timtem balala ajangshiba khuret ajemdaktsütsü mechi chiyongtsü aser osettsüset balala agütsüba mapang Food and Civil Supply department ajanga Priority Households agent tem dang April 15, 2020 tashinung ita atem indang sen jelia deposit asütsü totuyuba agütsüba angazüka Dimapur Naga Students’ Union (DNSU) aoksar, ta sangdong ka ajanga lemsatep.
Tang ama tensa tamajung, kong makamaitertem tali tim atemba mapang aser Central sorkari ita asem talila jang-otzü angadi agütsütsü sangdonga lia komaser sorkar indang department kati iba amala totuyuba agütsütsü bilemteter, ta DNSU ajanga asüngdang.
Central sorkari nüngdakba osettsüset angadi agütgsütsü totuyuba aser sangdong agüjang tagütsü, item meraji sorkari agitsü tim, ta parnoki ashi.
Maneni parnokisa COVID-19 tendangba oset maliba atema süoki ia bilemba lemsatepa liasü.
Linük aser kidanger state nung COVID-19 tashidak tali putetba mapang item osettsüset agi anüngba ajanga nübur tali tsübuteper aser nüburtem asoshi lendong tulu kümogo. Anungji menua melie sorkari tekeratiba nung COVID-19 testing lab amenoktsüla, ta DNSU ajanga ashi.
Doctor, Nurse, police personnel aser sorkar agency balalai coronavirus tashidak prokshiba nungi nokdangtsü mechi asentzü sena meranga inyakba asoshi kanga pelashishia agizüker, ta Dimapur nung kakatshir tentet ajangasa ashi.
NGO balalai nüngdakbapur nem senotsü aser osettsüset teyari agütsüba asoshi kanga pelar aser ano maneni tanga lokti tentet, arogo, charity, kin balalaika pei aliba tesem nung makamaiter aser talisa talidak ki maker nem teyari agütsütsü ayongzüker, ta DNSU sangdong ajangasa ashi.