NPF-i Tsüngrem tenüng asanger; PDA sorkar dang asüngdanger

Dimapur, March 29 (TYO): Novel Corona virus (Covid-19) wara ajanga alima ajunga den külemi Nagaland state shibanga lir, ajisüaka tanü tashi Nagaland nung Covid-19 aketer ka dang meputetba atema Tsüngrem nem tenüngsang agütsür, ta Naga People’s Front (NPF)-i metetdaktsü.
Nagaland nung health-care mapa inyaker aser police-i iba tashidak meprokshidaktsütsü atema mapa inyakba atema pelar aser tenüngsang agütsür. Ajisüaka, state sorkari iba atema sentong renemba aser sorkar mapa inyakertem itasen nungi sen agizükba atema tebilemtsü abener, ta NPF-isa ashi.
CM Relief fund tentetbaji tajung aser iba ajanga nisungtemi loktiliba ajungtsü atema pei pei akok tenla agütsüteter, saka tenla agütsübaji pei mulung agi asütsüla aser tashiyim agibo magütsüdaktsütsüla, ta Press Bureau, NPF-i sangdong ka nung ashi.
“PDA sorkari department kar nung inyakertem indang itasen nungi anogo ka indang sen agizüktsü lemtetba atema mepelar. Talisa Covid-19 wara anema inyaker ‘Frontline Workers’ nung police dena lir saka parnok dang nungia anogo ka indang sen agizükbaji kanga tim masü, kechiyong state ajunga shibangaka, police mapabo kasa dang inyakdar anungji parnok asoshi bilemtsütsüla” ta NPF-isa ashi.
Nagaland nung Sanitation Workers, Doctors aser Nurses den ano kija aser telok balalai alima wara anema mapa inyaker anungji parnok indang itasen nungi sen magizüki, sorkari meyiper parnok nem ang sempet talila agütsütsüla” ta parnokisa shisem.
“District kar nung jang dena tongtipang tenüngdaktsütem peria manguba osang angashia NPF-i tebilemtsü abener. PDA sorkari nübortemi dang jang angutsü atema ita asem indang sen agüjang ta ashiba tim masü aser iba ajanga parnok dak tangatetba maliba sayur” ta Press Bureau-isa ashi.
“State sorkari tawa VDB matching grant fund nungi sen crore 17 agizükba ajanga tang tongtipang nüngdakbatem alizüka atatsü aser iba senji yaser COVID-19 indang Relief Funding nungi meyipa agütsütsü atema onoki tebilemba ka shidanger” ta NPF-isa metetdaktsü.
“State sorkari public dang nungi meshimetsü masütsüla aser sen maliba nung atemer mapa inyaktsü maoker ta meshii, Goods and Services Tax (GST) dena sorkar keti sen crore aika arubatem amshia, nübor nem tongtipang tenüngdaktsütem peria agütsütsüla” ta parnokisa ashi.
Nagaland sorkari COVID-19 atema renema lir ta ashir saka külen tang nüngdak facility mali kangshir. Anungji, COVID-19 anema inyakba mapa nung sorkari tashishitsü melii inyaktsüla kechiyong iba nung Nagaland sensotem taküm dena lir, ta NPF-isa ashi.
“Tia kaa Nagaland nungbo COVID-19 puteta mali saka putetra, state sorkari kechi inyaktsü renema lir?” ta parnokisa asüngdang.